बाँके, जेठ ४ गते ।
नेपाल विद्युत् प्राधिकरणको नेपाल विद्युत् प्राधिकरण अन्तर्गत नेपालगञ्ज वितरण केन्द्रले बाँके जिल्लामा विद्युत् आपूर्ति सुधार गर्न पाँच वटा नयाँ फिडर थप गरेको छ । गर्मीयाममा बढ्दो विद्युत् मागलाई ध्यानमा राख्दै केन्द्रले सेवा प्रवाहलाई थप प्रभावकारी बनाएको जनाएको छ ।
यसअघि १६ वटा फिडरमार्फत गाउँ तथा सहर क्षेत्रमा विद्युत् आपूर्ति हुँदै आएकामा अब पाँच नयाँ फिडर थपिएपछि गाउँ र सहरका लागि छुट्टाछुट्टै फिडर सञ्चालनमा ल्याइएको केन्द्र प्रमुख संजयकुमार मिश्रले जानकारी दिए । उनका अनुसार छुट्टाछुट्टै फिडर सञ्चालनमा आएपछि दुवै क्षेत्रमा विद्युत् वितरण प्रणाली व्यवस्थित हुनुका साथै भोल्टेज समस्यामा पनि उल्लेखनीय सुधार आएको छ ।
केन्द्रले वितरण लाइनमा प्रयोग भएका कमजोर तथा मसिना तार व्यवस्थापन गर्दै आवश्यक स्थानमा नयाँ ट्रान्सफर्मरसमेत जडान गरेको जनाएको छ । यसपछि जिल्लामा कम भोल्टेजसम्बन्धी गुनासो न्यून भएको केन्द्रको दाबी छ । विद्युत्को बढ्दो मागलाई दीर्घकालीन रूपमा व्यवस्थापन गर्न पूर्वाधार विस्तारलाई प्राथमिकतामा राखिएको प्रमुख मिश्रले बताए ।
विद्युत् सेवा सुधार र चुहावट नियन्त्रण अभियानअन्तर्गत वितरण केन्द्रले नियमित मिटर अनुगमन, हुकिङ नियन्त्रण तथा मिटरमा गडबडी गर्ने ग्राहकको पहिचानका लागि सार्वजनिक बिदाका दिनसमेत स्थलगत निरीक्षण गरिरहेको छ । सिँचाइ, घरेलु तथा अन्य उपभोक्तालाई प्रदान भइरहेको सेवाको अवस्थाबारे समेत निरन्तर अनुगमन भइरहेको केन्द्रले जनाएको छ ।
पछिल्ला महिनाहरूमा सञ्चालन गरिएको सेवा सुधार तथा चुहावट नियन्त्रण अभियानका कारण बाँकेमा विद्युत् आपूर्तिमा सकारात्मक सुधार देखिएको केन्द्रको भनाइ छ । नयाँ फिडर थपिएपछि ओभरलोडको समस्या घटेकाले गर्मीयाममा पनि विद्युत् आपूर्ति अवरुद्ध हुने सम्भावना कम भएको प्रमुख मिश्रले बताए ।
यसैबीच, नेपालगञ्ज वितरण केन्द्रअन्तर्गतको नोलाइट शाखामार्फत विभिन्न महत्त्वपूर्ण स्थानमा नाङ्गो तार विस्थापन गरी केबुल विस्तारको कामसमेत अघि बढाइएको छ । मर्मत शाखाले नियमित अनुगमन र आवश्यक मर्मत कार्यलाई तीव्रता दिएकाले विद्युत् चोरी नियन्त्रण, दुरुपयोग न्यूनीकरण तथा सेवा प्रवाहमा थप सुधार आएको केन्द्रले जनाएको छ ।
Discussion about this post