बाँके, जेठ ३० गते ।
बाँकेमा आयोजना हुन लागेको ‘माननीय मिना बोहरा सिद्धिकी टी–१० वडा कप क्रिकेट प्रतियोगिता–२०८३’ को सम्पूर्ण तयारी पूरा भएको छ। लुम्बिनी प्रदेश सरकारको सामाजिक विकास डिभिजन कार्यालय, बाँकेको आर्थिक सहयोगमा ज्योति स्पोट्र्स एकेडेमीले आइतबारदेखि प्रतियोगिता सञ्चालन गर्न लागेको हो।
प्रतियोगिताका लागि आर्थिक वर्ष २०८२÷०८३ मा समाजसेवी असफाक अन्सारीको विशेष पहलमा लुम्बिनी प्रदेश सभा सदस्य मिना बोहरा सिद्धिकीले २० लाख रुपैयाँ बजेट विनियोजन गराएकी थिइन्।
प्रतियोगिताको तयारीबारे जानकारी दिन शनिबार नेपालगन्जमा आयोजित पत्रकार सम्मेलनमा प्रमुख अतिथि तथा लुम्बिनी प्रदेश सभा सदस्य सिद्धिकीले क्रिकेट नेपालको लोकप्रिय र सम्भावनायुक्त खेल भएकाले यसको विकास र प्रवद्र्धनका लागि प्रदेश सरकारमार्फत बजेट व्यवस्थापन गरिएको बताइन्। खेलाडी तथा स्थानीय खेलप्रेमीहरूको माग र आवश्यकतालाई ध्यानमा राखेर बजेट विनियोजन गरिएको उल्लेख गर्दै उनले वडा–वडामा क्रिकेटप्रतिको बढ्दो आकर्षणले आफूलाई उत्साहित बनाएको बताइन्।
पत्रकार सम्मेलनमा ज्योति स्पोट्र्स एकेडेमीका अध्यक्ष सिद्धान्तराज शाहीले प्रतियोगिताका लागि आवश्यक बजेट उपलब्ध गराएकोमा प्रदेश सभा सदस्य सिद्धिकी तथा विशेष पहलकर्ता असफाक अन्सारीप्रति आभार व्यक्त गरे। उनका अनुसार प्रतियोगिता लेदर बलमार्फत नकआउट प्रणालीमा सञ्चालन हुनेछ।
प्रतियोगिताको उद्घाटन तथा समापन खेल मंगलप्रसाद माध्यमिक विद्यालयको खेल मैदानमा हुनेछ भने अन्य खेलहरू कोहलपुरस्थित अन्तर्राष्ट्रिय क्रिकेट मैदानमा सञ्चालन गरिनेछन्। उद्घाटन समारोह आइतबार बिहान १० बजे हुने आयोजकले जनाएको छ।
प्रतियोगिताका विजेता टोलीलाई नगद ३ लाख रुपैयाँ, ट्रफी, मेडल तथा प्रमाणपत्र प्रदान गरिनेछ भने उपविजेता टोलीले नगद २ लाख रुपैयाँ सहित ट्रफी, मेडल र प्रमाणपत्र प्राप्त गर्नेछ। त्यसैगरी उत्कृष्ट खेलाडीलाई ३० हजार रुपैयाँभन्दा बढी नगद पुरस्कार प्रदान गरिनेछ भने उत्कृष्ट ब्याटर र उत्कृष्ट बलरलाई जनही २५–२५ हजार रुपैयाँ नगद पुरस्कार दिइने आयोजकले जनाएको छ।
नेपालगन्ज उपमहानगरपालिकाका २३ वडामध्ये १९ वटा वडाको सहभागिता रहने यस प्रतियोगिताले स्थानीयस्तरमा क्रिकेटको विकास, प्रतिभाको पहिचान तथा खेल संस्कृतिको प्रवद्र्धनमा महत्वपूर्ण योगदान पुग्ने अपेक्षा गरिएको छ।
पत्रकार सम्मेलनमा लुम्बिनी प्रदेशका पूर्वसांसद मोहम्मद याकुव अन्सारी, नेपालगन्ज उपमहानगरपालिकाकी कार्यपालिका सदस्य सञ्जु रेग्मी, नेपाल क्रिकेट संघका पूर्वकेन्द्रीय उपाध्यक्ष बिनोद मैनाली, नेपाल मुस्लिम संघका केन्द्रीय सदस्य मेराज हल्वाई, समाजसेवी असफाक अन्सारी लगायतको उपस्थिति रहेको थियो।
Discussion about this post