दाङ, असार ४ गते।
दाङ जिल्लाका विभिन्न सामुदायिक वन क्षेत्रमा प्रहरीले गस्तीका क्रममा ४ नाल अवैध भरुवा बन्दुक तथा त्यसमा प्रयोग हुने विभिन्न सामग्री बरामद गरेको छ।
जिल्ला प्रहरी कार्यालय दाङका अनुसार बुधबार प्रहरी चौकी रामपुरबाट प्रहरी सहायक निरीक्षक टेकबहादुर कुसारीको कमाण्डमा खटिएको प्रहरी टोलीले घोराही उपमहानगरपालिका–२ स्थित गौरी बबई सामुदायिक वन क्षेत्रमा गस्ती गर्ने क्रममा ३ नाल अवैध भरुवा बन्दुक फेला पारी बरामद गरेको हो।
उक्त स्थानबाट प्रहरीले ४२ वटा फलामका टुक्रा, २० वटा केप, १ वटा चक्कु तथा करिब २०० ग्राम बारुद समेत बरामद गरेको जनाएको छ।
यसैगरी, इलाका प्रहरी कार्यालय तुलसीपुरबाट प्रहरी निरीक्षक असिम हमालको कमाण्डमा खटिएको टोलीले असार २ गते तुलसीपुर उपमहानगरपालिका–१३ स्थित जुमिलकुला लेडुवा सामुदायिक वन क्षेत्रमा गस्ती गर्ने क्रममा १ नाल अवैध भरुवा बन्दुक बरामद गरेको थियो।
बरामद गरिएका सबै सामग्री प्रहरीले नियन्त्रणमा लिएको छ। घटनाका सम्बन्धमा थप अनुसन्धान भइरहेको जिल्ला प्रहरी कार्यालय दाङका सूचना अधिकारी तथा प्रहरी नायब उपरीक्षक डा. हेमबहादुर केसीले जानकारी दिएका छन्।
Discussion about this post