बाँके असार १६ गते ।
मङ्गलबार बिहानदेखि परेको निरन्तर वर्षाका कारण नेपालगन्ज उपमहानगरपालिकाका अधिकांश क्षेत्र जलमग्न भएका छन्। ढल तथा नालाको नियमित सरसफाइ नहुँदा फोहोरले पानीको निकास अवरुद्ध भएपछि पहिलो ठूलो वर्षामै विभिन्न बस्ती डुबानमा परेका हुन्।
स्थानीयवासीका अनुसार बिहान करिब ५ बजेदेखि सुरु भएको वर्षा दिउँसोसम्म निरन्तर जारी रहँदा नगरका सडक, चोक तथा बस्तीहरूमा पानी जमेको हो। न्युरोडका स्थानीय दीपक थापाले पानीको निकास नहुँदा अधिकांश सडक जलमग्न भएको बताए।
डुबान प्रभावित क्षेत्रहरूमा घरबारी टोल, न्युरोडको सेतु विक चोकदेखि त्रिवेणी मोडसम्म, फुल्टेक्रास्थित वडा प्रहरी कार्यालय आसपास, गणेशपुर, बसपार्क क्षेत्र, धम्बोझी, एकलैनी टोल, बिलासपुर, कोरियनपुर तथा भृकुटीनगरलगायतका बस्ती रहेका छन्। ती क्षेत्रमा सडक र घरआँगनमा पानी भरिँदा स्थानीयवासीको दैनिक जनजीवन प्रभावित भएको छ।
नागरिक सरोकार मञ्चका संयोजक कृष्णप्रसाद श्रेष्ठका अनुसार नगरका अधिकांश स्थानमा ढल तथा नालाको संरचना भए पनि नियमित सरसफाइको अभावमा फोहोर थुप्रिएर पानीको निकास अवरुद्ध भएको छ। त्यसकै परिणामस्वरूप वर्षा हुनासाथ विभिन्न स्थानमा पानी जम्ने समस्या दोहोरिने गरेको उनले बताए।
डुबानका कारण स्थानीय बासिन्दालाई आवतजावतमा कठिनाइ भएको छ भने केही स्थानमा पसल तथा घरभित्र पानी पसेर क्षति पुगेको छ। न्युरोडका व्यवसायी अमर अन्सारीका अनुसार वर्षाको पानी पसलभित्र प्रवेश गर्दा विभिन्न सामानमा क्षति पुगेको छ। उनले ढल र नालाको नियमित सरसफाइ तथा प्रभावकारी व्यवस्थापन नहुँदा हरेक वर्ष सामान्य वर्षामै डुबानको समस्या भोग्नुपरेको गुनासो गरे।
यस विषयमा स्थानीयवासीले नेपालगन्ज उपमहानगरपालिका र सम्बन्धित वडा कार्यालयले ढल तथा नालाको नियमित सरसफाइ र पानी निकास व्यवस्थापनमा पर्याप्त ध्यान नदिएको आरोप लगाएका छन्।
Discussion about this post