काठमाडौं, असार ३१ गते ।
आफ्नै उत्पादनले बजार र मूल्य नपाएको भन्दै किसानहरूले बुधबार काठमाडौंको माइतीघर मण्डलामा गोलभेँडा सडकमा फालेर सरकारविरुद्ध प्रदर्शन गरेका छन्।
उनीहरूले सरकारको कृषि नीति किसानमैत्री नभएको, उत्पादनको उचित मूल्य, बजारको सुनिश्चितता र आवश्यक अनुदान नपाउँदा किसान विस्थापित हुने अवस्थामा पुगेको आरोप लगाए। विरोधस्वरूप किसानहरूले आफूहरूले उत्पादन गरेको गोलभेँडा सडकमै फाल्दै सरकारको ध्यानाकर्षण गराएका हुन्।
प्रदर्शनमा सहभागी किसानहरूले उत्पादन लागतसमेत उठाउन नसक्ने अवस्था सिर्जना भएको, बजारमा सस्तो आयातित तरकारीको दबाबका कारण स्वदेशी उत्पादनले प्रतिस्पर्धा गर्न नसकेको र राज्यले किसानको हितभन्दा आयातमुखी नीतिलाई प्राथमिकता दिएको गुनासो गरे।
किसानहरूले कृषि उत्पादनको न्यूनतम समर्थन मूल्य निर्धारण, उत्पादनमा अनुदान वृद्धि, गुणस्तरीय मल–बीउको सहज उपलब्धता, कृषि उपजको प्रभावकारी बजार व्यवस्थापन तथा स्वदेशी उत्पादन संरक्षण गर्ने नीति तत्काल कार्यान्वयन गर्न माग गरेका छन्।
उनीहरूले सरकारले आफ्ना मागप्रति गम्भीरता नदेखाए आन्दोलनका कार्यक्रम थप सशक्त बनाउने चेतावनीसमेत दिएका छन्।
Discussion about this post