सप्तरीे, साउन २ गते ।
सप्तरीको राजविराज कारागारमा शनिबार बिहान कैदीबन्दीबीच विवाद भएपछि पाँच जनाले मट्टितेल छर्केर आत्मदाहको प्रयास गरेका छन्। समयमै सुरक्षाकर्मी र स्वास्थ्यकर्मीको हस्तक्षेप भएपछि मानवीय क्षति भने हुन पाएन।
कारागारका निमित्त जेलर रुपक मण्डलका अनुसार दुई–तीन दिनयता कैदीबन्दीबीच आन्तरिक विवाद चलिरहेको थियो। सोही विषयमा असन्तुष्ट बनेका केही कैदीबन्दीले आत्मदाहको प्रयास गरेका हुन्।
उनले हाल सम्बन्धित पक्षबीच छलफल जारी रहेको र अवस्था सामान्यतर्फ उन्मुख रहेको बताए। यद्यपि विवादको कारणबारे उनले विस्तृत जानकारी दिन चाहेनन्।
मण्डलका अनुसार आत्मदाहको प्रयास भएको बेला कारागारभित्र चिकित्सकको टोली र एम्बुलेन्स तयारी अवस्थामा रहेकाले कुनै मानवीय क्षति वा गम्भीर चोटपटक भएको छैन।
सप्तरीका प्रमुख जिल्ला अधिकारी श्यामकृष्ण थापाले चौकिदारले एक जना कैदीबन्दीलाई सामान्य कुटपिट गरेको विषयबाट विवाद सुरु भएको प्रारम्भिक जानकारी प्राप्त भएको बताए। त्यसपछि असन्तुष्ट कैदीबन्दीले विरोध जनाउँदै आत्मदाहको प्रयास गरेका थिए।
उनका अनुसार अहिले कैदीबन्दीलाई सम्झाइबुझाइ गरी अवस्था पूर्ण रूपमा नियन्त्रणमा ल्याइएको छ। कैदीबन्दीले सबैसँग सम्मानजनक व्यवहार हुनुपर्ने माग राखेका छन्।
घटनाबारे थप अनुसन्धान भइरहेको जिल्ला प्रशासन कार्यालयले जनाएको छ।
Discussion about this post