बाँके, साउन ३ गते ।
नेपाल विद्युत प्राधिकरण, नेपालगन्ज वितरण केन्द्रले बाँकेका ग्रामीण क्षेत्रमा सञ्चालन गरेको विद्युत चुहावट नियन्त्रण अभियानका क्रममा १४ वटा बेवारिसे मिटर फेला पारेको छ। साथै नियमविपरीत विद्युत प्रयोग गरिरहेका ७४३ जना ग्राहकको डिमान्ड चुहावट नियन्त्रण गरी कारबाही प्रक्रिया अघि बढाएको छ।
खजुरा उपवितरण केन्द्रका प्रमुख दिनेश वलीका अनुसार बेवारिसे मिटरबाट करिब एक लाख ५० हजार युनिट बराबरको विद्युत खपत भएको पहिचान गरिएको छ। उक्त खपतलाई राजस्वको दायरामा ल्याई लगत कायम गर्ने प्रक्रिया सुरु गरिएको उनले बताए।
त्यस्तै, ५ एम्पियर क्षमताका मिटरमा नियमविपरीत १६ र ३२ एम्पियरका एमसीबी प्रयोग गर्ने ७४३ ग्राहकबाट प्राधिकरणको प्रचलित नियमअनुसार राजस्व असुल गर्ने प्रक्रिया अघि बढाइएको छ।
वलीका अनुसार अभियानसँगै ग्राहकका गुनासा स्थलगतमै सम्बोधन गर्ने, नयाँ ट्रान्सफर्मर जडान, पोल तथा तार विस्तार र लाइन क्षमता अभिवृद्धिजस्ता सेवा सुधारका काम पनि तीव्र रूपमा सञ्चालन भइरहेका छन्।
नेपालगन्ज वितरण केन्द्रका प्रमुख संजयकुमार मिश्रले अभियानबाट विद्युत चुहावट नियन्त्रण भई प्राधिकरणको राजस्व वृद्धि हुनुका साथै आगामी दिनमा विद्युत सेवा अझ सुरक्षित, भरपर्दो र गुणस्तरीय बन्ने विश्वास व्यक्त गरे।
Discussion about this post