बाँके, साउन ४ गते ।
बाँकेमा ४८ ग्राम ७० मिलिग्राम ब्राउन सुगरजस्तो देखिने लागूऔषधसहित दुई जना पक्राउ परेका छन्।
लुम्बिनी प्रदेश प्रहरी कार्यालय तुलसीपुर दाङ, जिल्ला प्रहरी कार्यालय बाँके र लागूऔषध नियन्त्रण ब्युरो शाखा कार्यालय नेपालगन्जको संयुक्त टोलीले आइतबार नेपालगन्ज उपमहानगरपालिका–११ मा गोप्य सूचनाका आधारमा बा १७ च १४२२ नम्बरको टाटा कम्पनीको कार रोकी जाँच गर्दा लागूऔषध बरामद गरेको हो।
पक्राउ पर्नेमा दाङको लमही नगरपालिका–५ का ३५ वर्षीय मधुसूदन पुलामी र सोही ठाउँका २८ वर्षीय निश्चल केसी छन्। प्रहरीका अनुसार कार चालक पुलामीको साथबाट ४८ ग्राम ७० मिलिग्राम ब्राउन सुगरजस्तो देखिने पदार्थ फेला परेको थियो।
प्रहरीले घटनास्थलबाट कार, दुई थान आईफोन १३ प्रो म्याक्स मोबाइल र बरामद लागूऔषध नियन्त्रणमा लिएको जनाएको छ।
दुवै जनाविरुद्ध लागूऔषध सम्बन्धी कसुरमा बाँके जिल्ला अदालतबाट १० दिनको म्याद थप अनुमति लिएर अनुसन्धान भइरहेको जिल्ला प्रहरी कार्यालय बाँकेका सूचना अधिकारी प्रहरी नायव उपरीक्षक प्रतित सिंह राठौरले जानकारी दिए।
Discussion about this post