बाँके, साउन १४ गते ।
बाँकेमा अस्पतालको सङ्ख्या र बिरामीको चाप बढ्दै गएपछि रगतको माग पनि उच्च भएको छ। मागअनुसार आपूर्ति गर्न कठिनाइ हुने गरेको भन्दै नेपाल रेडक्रस सोसाइटी प्रादेशिक रक्तसञ्चार सेवा केन्द्र नेपालगन्जले नियमित रक्तदान गर्न रक्तदातालाई आग्रह गरेको छ।
केन्द्रका प्रमुख उपेन्द्र रेग्मीका अनुसार पछिल्लो समय रगतको माग उच्च रहेकाले अधिकांश समय अभावको अवस्था रहने गरेको छ। बाँकेमा उपचारका लागि आउने बिरामीको सङ्ख्या बढ्दै गएसँगै रगतको आवश्यकता पनि बढिरहेको उनले बताए।
रगतको अभाव न्यूनीकरण गर्ने उद्देश्यले नेपाल रेडक्रस सोसाइटी बाँके जिल्ला शाखाले ६१औँ रक्तसञ्चार सेवा स्थापना दिवस सप्ताहव्यापी रक्तदान कार्यक्रम आयोजना गरेर मनाएको छ।
कार्यक्रमअन्तर्गत अछामी सेवा समाज बाँकेले ५१ पिन्ट, राष्ट्रिय स्वतन्त्र पार्टी कोहलपुरले ८१ पिन्ट तथा भेरी अस्पताल नेपालगन्जले आफ्नो १३६औँ वार्षिकोत्सवका अवसरमा ३३ पिन्ट रगत सङ्कलन गरेको रेग्मीले जानकारी दिए।
प्रादेशिक रक्तसञ्चार सेवा केन्द्र नेपालगन्जका अनुसार आर्थिक वर्ष २०८२÷८३ मा केन्द्रबाट २४ हजार ५२६ पिन्ट रगत वितरण गरिएको छ। नेपालगन्ज, कोहलपुर र खजुरा क्षेत्रमा रहेका २२ वटा अस्पतालमा चिकित्सकको सिफारिसका आधारमा बिरामीलाई रगत उपलब्ध गराइएको केन्द्रले जनाएको छ।
बाँके लुम्बिनी, कर्णाली र सुदूरपश्चिम प्रदेशका बिरामी उपचारका लागि आउने प्रमुख स्वास्थ्य केन्द्रका रूपमा विकसित हुँदै गएको छ। ती प्रदेशबाट ठूलो सङ्ख्यामा बिरामी उपचारका लागि बाँके आउने भएकाले जिल्लामा सुरक्षित र पर्याप्त रक्तसञ्चार सेवाको आवश्यकता बढ्दै गएको केन्द्रले जनाएको छ।
नेपाल रेडक्रस सोसाइटी बाँके जिल्ला शाखाका सभापति गोवर्धनसिंह सम्झनाले स्वास्थ्य सेवा विस्तारसँगै जिल्लामा रगतको आवश्यकता हरेक वर्ष बढिरहेको बताए।
‘अस्पतालको सङ्ख्या बढेको छ, बिरामीको चाप पनि उल्लेख्य रूपमा बढेको छ। त्यसअनुसार रगतको माग हरेक दिन बढिरहेको छ। यस्तो अवस्थामा स्वयंसेवी तथा संस्थागत रक्तदाताले पु¥याएको योगदान अत्यन्त महत्त्वपूर्ण छ,’ उनले बताए।
हाल नेपाल रेडक्रस सोसाइटी बाँके जिल्ला शाखाले जिल्लाका तीन स्थानबाट रक्तसञ्चार सेवा सञ्चालन गर्दै आएको छ। प्रादेशिक रक्तसञ्चार सेवा केन्द्र नेपालगन्ज, कोहलपुर मेडिकल कलेज शिक्षण अस्पतालस्थित रक्तसञ्चार सेवा इकाइ र सुशील कोइराला प्रखर क्यान्सर अस्पताल खजुरास्थित रक्तसञ्चार सेवा इकाइमार्फत सेवा प्रदान हुँदै आएको छ।
रेडक्रसले रगतको अभाव हुन नदिन नियमित रक्तदानको संस्कृतिलाई थप सुदृढ गर्ने र स्वयंसेवी रक्तदाताको सङ्ख्या बढाउने उद्देश्यले विभिन्न समयमा रक्तदान कार्यक्रम सञ्चालन गर्दै आएको जनाएको छ।
Discussion about this post