बाँके, भदौ १३ गते ।
भोटेकोशीमा आएको भीषण बाढीमा परी कोहलपुरका एक जनाको मृत्यु भएको छ भने ११ जना अझै बेपत्ता छन्। कोहलपुर नगरपालिका–११ का कविराम थारुको मृत्यु भएको पुष्टि भएको नगरपालिकाले जनाएको छ।
चितवनमा फेला परेको उनको शव शुक्रबार कोहलपुर ल्याएर अन्त्येष्टि गरिएको नगर प्रहरी प्रमुख वीरबहादुर थापाले बताए। बाढीमा ज्यान गुमाएका नगरवासीका परिवारलाई कोहलपुर नगरपालिकाले काजकिरिया खर्चबापत तत्काल जनही ५० हजार रुपैयाँ राहत दिने निर्णय गरेको नगर प्रमुख पूर्णप्रसाद आचार्यले जानकारी दिए।
बेपत्ता नागरिकको खोजी र उद्धारका लागि नगरपालिकाले जनप्रतिनिधि, नगर प्रहरी र आफन्तसहितको टोली परिचालन गर्ने भएको छ। वडा नम्बर १२ का अध्यक्ष वीरेन्द्रकुमार शाहको नेतृत्वमा वडा नम्बर २ का अध्यक्ष हरिसिंह कठायत, वडा नम्बर ५ का अध्यक्ष दीपेन्द्र श्रेष्ठ र वडा नम्बर ६ का अध्यक्ष श्रीकृष्ण थारुसहितको टोली सम्बन्धित क्षेत्रमा पुगेर खोजी तथा उद्धारमा समन्वय गर्नेछ। विपद्मा प्रभावित नागरिकको खोज, उद्धार, राहत तथा शव व्यवस्थापनको जिम्मेवारी नगरपालिकाले लिने निर्णय गरेको छ।
नगर कार्यपालिकाले बाढीमा ज्यान गुमाउनेप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरेको छ। राहत र उद्धारमा सहयोग पु¥याउन नगरपालिकाका जनप्रतिनिधि र कर्मचारीले तीनदेखि सात दिनसम्मको पारिश्रमिक बराबरको रकम प्रधानमन्त्री दैवी प्रकोप उद्धार कोषमा जम्मा गर्ने निर्णयसमेत गरिएको नगर प्रमुख आचार्यले बताए।
Discussion about this post