बाँके, भदौ २५ गते ।
रसुवा–भोटेकोसी नदीमा आएको बाढीमा परी सम्पर्कविहीन बाँकेको कोहलपुरका एक दम्पतीका तीन सन्तानलाई भारतको उत्तर प्रदेशस्थित एक समाजसेवी परिवारले आर्थिक सहयोग गरेको छ।
कोहलपुर नगरपालिका–१२ का वीरेन्द्र जोशी र उनकी श्रीमती सत्या जोशी भदौ १० गतेदेखि सम्पर्कविहीन छन्। रसुवागढी नाकामा पार्किङ व्यवस्थापनको काम गर्दै आएका उनीहरू बाढीपहिरोमा परेपछि सम्पर्कविहीन भएका हुन्।
अभिभावक नै सम्पर्कविहीन भएपछि उनीहरूका तीन सन्तानको सहयोगका लागि भारतको उत्तर प्रदेश, लखिमपुर खिरीस्थित गोला गोकर्णनाथका समाजसेवी केशवराम अग्रवाल परिवार अघि आएको हो।
अग्रवाल परिवारले भारतीय एक लाख रुपैयाँ सहयोग गरेको हो। नेपाली रुपैयाँमा करिब एक लाख ६० हजार बराबर हुने उक्त सहयोगमध्ये तत्काल एक लाख रुपैयाँ जोशी परिवारलाई हस्तान्तरण गरिएको छ।
अग्रवालले आफ्ना छोरा मधुर र अमित अग्रवालमार्फत नेपालगन्जका वरिष्ठ सुनचाँदी व्यवसायी सकिल अहमद जसगढसँग समन्वय गरी रकम पठाएका थिए। जिल्ला प्रशासन कार्यालय बाँकेमा प्रमुख जिल्ला अधिकारी दिलकुमार तामाङको रोहबरमा श्री नेपाल ज्वेलर्सका सञ्चालक जसगढले जोशी परिवारलाई एक लाख रुपैयाँ हस्तान्तरण गरे।
जोशी दम्पतीका जेठा छोरा सन्तोष आफ्ना मामासहित जिल्ला प्रशासन कार्यालय पुगेका थिए। उनले सहयोग रकम बुझेका हुन्।
परिवारलाई तत्काल नगद आवश्यक देखिएकाले पहिलो चरणमा एक लाख रुपैयाँ हस्तान्तरण गरिएको जसगढले बताए।
‘परिवारलाई तत्काल आवश्यक परेकाले एक लाख रुपैयाँ नगद हस्तान्तरण गरिएको हो,’ जसगढले भने, ‘बाँकी ६० हजार रुपैयाँ बराबरको सहयोग आवश्यक सामग्री खरिदमा खर्च गरिनेछ।’
जोशी दम्पतीका तीन सन्तानमध्ये जेठा सन्तोषले प्लस टु अध्ययन पूरा गरेका छन्। बहिनी सुनीता स्वास्थ्य विज्ञानमा उच्च शिक्षा अध्ययनको तयारीमा छिन् भने भाइ सुनील कक्षा ८ मा अध्ययनरत छन्।
अभिभावक सम्पर्कविहीन भएपछि दुई साना सन्तानको पढाइ निरन्तरता दिनसमेत समस्या हुने देखिएको छ। उनीहरूको शिक्षामा सहयोग पु¥याउने विषयमा अग्रवाल परिवारसँग समन्वय भइरहेको जसगढले बताए।
‘साना दुई बच्चाको अध्ययन खर्चमा समेत सहयोग गर्न सकिने गरी दातासँग समन्वय भइरहेको छ,’ उनले भने।
जडीबुटी कारोबारमा संलग्न अग्रवाल परिवारले विपद्मा परेका परिवारलाई सहयोग गर्न इच्छुक अन्य परिवारसँग समेत समन्वय गरी मानवीय सेवामा सहकार्य गर्ने इच्छा व्यक्त गरेको जसगढले बताए।
जसगढ स्वयंले पनि यसअघि प्रधानमन्त्री राहत कोषमा दुई लाख ११ हजार रुपैयाँ सहयोग गरिसकेको जानकारी दिए।
Discussion about this post