काठमाडौं, असोज १ गते ।
आज असोज १ गते देशभर विभिन्न यन्त्र, औजार, प्रविधि तथा सवारीसाधनको पूजाआजा गरी भगवान् विश्वकर्माको आराधनासहित ‘विश्वकर्मा पूजा’ मनाइँदैछ ।
समुद्र मन्थनबाट उत्पत्ति भएको मानिने भगवान् विश्वकर्माको जन्म आजकै दिन भएको जनविश्वास रहेकाले असोज १ गतेलाई विश्वकर्मा जयन्तीका रूपमा समेत मनाउने गरिन्छ ।
विश्वकर्मा पूजाका अवसरमा उद्योग, कलकारखाना, ग्यारेज, वर्कसप तथा विभिन्न व्यापारिक प्रतिष्ठानमा कार्यरत मजदुर, कलाकार, शिल्पकार तथा उद्यमीहरूले आफ्ना मेसिनरी सामान, यन्त्र तथा औजारको सरसफाइ गरी विशेष पूजा गर्ने परम्परा छ ।
यस्तै, नयाँ सवारीसाधन खरिद गरेका तथा यसअघि प्रयोगमा रहेका सवारीसाधनलाई समेत विभिन्न शक्तिपीठ तथा मन्दिरमा लगेर पूजा गर्ने चलन छ । काठमाडौंका भद्रकाली, दक्षिणकालीलगायत देशभरका विभिन्न शक्तिपीठमा बिहानैदेखि सवारीसाधन पूजा गर्न आउनेहरूको भिड देखिएको छ ।
विश्वकर्मा पूजालाई मेहनत, सीप, प्रविधि र उत्पादनसँग जोडिएको पर्वका रूपमा समेत लिइन्छ । यस दिन विशेषगरी मेसिन, औजार तथा सवारीसाधनको पूजा गरी वर्षभर सुरक्षित र सहज रूपमा काम होस् भन्ने कामना गरिन्छ ।
Discussion about this post