बाँके, असोज १९ गते ।
दसैँ, तिहार तथा छठ पर्वलाई लक्षित गर्दै खाद्य व्यवस्था तथा व्यापार कम्पनी लिमिटेडको नेपालगन्जस्थित मुख्य शाखा कार्यालयले सहुलियत दरमा चामल बिक्री सुरु गरेको छ ।
कार्यालयले सहुलियत बिक्री केन्द्र सञ्चालन गरी विभिन्न प्रकारका चामलमा प्रतिक्विन्टल ५ सय रुपैयाँ छुट दिएर बिक्री गरिरहेको छ । चाडपर्वको अवधिभर १ सय क्विन्टल चामल बिक्री गर्ने लक्ष्य राखिएको खाद्य व्यवस्था तथा व्यापार कम्पनी लिमिटेड नेपालगन्जका सूचना अधिकारी शिवराज घिमिरेले बताए ।
उनका अनुसार कार्यालयबाट अरुवा मोटा, अरुवा मध्यम, मध्यम सिल्की, स्टिम मसिनो जिरा र स्टिम जिरा फोर्टिफाइड चामल बिक्री भइरहेको छ ।
‘चाडपर्वलाई लक्षित गरी सञ्चालन गरिएको बिक्री केन्द्रबाट चाडपर्व अवधिभर १ सय क्विन्टल चामल बिक्री गर्ने लक्ष्य लिएका छौँ,’ घिमिरेले भने, ‘उपभोक्ताको मागअनुसार विभिन्न प्रकारका चामल सहुलियत दरमा बिक्री गरिरहेका छौँ ।’
घिमिरेका अनुसार शुक्रबारसम्म अरुवा मोटा चामल ५० किलो, अरुवा मध्यम ४ दशमलव ७५ क्विन्टल, मध्यम सिल्की १ दशमलव ५० क्विन्टल, स्टिम जिरा मसिनो ६४ दशमलव ५० क्विन्टल र स्टिम जिरा फोर्टिफाइड ५ क्विन्टल बिक्री भइसकेको छ ।
सहुलियतपछि मोटा चामल प्रतिक्विन्टल ५ हजार ६ सय रुपैयाँ, अरुवा मध्यम ५ हजार ८ सय रुपैयाँ, मध्यम सिल्की ५ हजार ९ सय रुपैयाँ तथा स्टिम जिरा मसिनो र स्टिम जिरा फोर्टिफाइड चामल प्रतिक्विन्टल ८ हजार ५ सय रुपैयाँमा बिक्री भइरहेको घिमिरेले जानकारी दिए ।
बजार मूल्यभन्दा कम दरमा चामल बिक्री हुन थालेपछि उपभोक्ताले प्रत्यक्ष लाभ लिन थालेका छन् ।
सीमावर्ती भारतीय बजार रुपैडिहाबाट चामल आयातमा नेपालगन्ज भन्सार कार्यालयले कडाइ गरेपछि स्थानीय उपभोक्ता सहुलियत दरमा चामल खरिद गर्न खाद्य व्यवस्था तथा व्यापार कम्पनीको बिक्री केन्द्रमा पुग्ने गरेका छन् ।
Discussion about this post