दाङ, असोज २६ गते ।
दाङमा टिपरको ठक्करबाट एक बालकको मृत्यु भएको छ। घोराही–लमही सडकखण्डअन्तर्गत घोराही उपमहानगरपालिका–३ कुइरेपानीमा सोमबार साँझ टिपरको ठक्करबाट प्युठानको नौबहिनी गाउँपालिका–१ निवासी राजन अधिकारीको मृत्यु भएको हो।
जिल्ला प्रहरी कार्यालय दाङका अनुसार रा १ ख २५११ नम्बरको टिपरले ठक्कर दिँदा गम्भीर घाइते भएका अधिकारीको उपचारका क्रममा मृत्यु भएको हो। उनलाई घोराहीस्थित राप्ती स्वास्थ्य विज्ञान प्रतिष्ठान लगिएको थियो।
जिल्ला प्रहरी कार्यालय दाङका सूचना अधिकारी एवं प्रहरी नायब उपरीक्षक डा. हेमबहादुर केसीले अस्पतालमा उपचारका क्रममा बालकको मृत्यु भएको जानकारी दिए। उनका अनुसार घोराहीबाट लमहीतर्फ जाँदै गरेको टिपरले बालकलाई ठक्कर दिएको थियो।
घटनामा संलग्न टिपर चालक तुलसीपुर उपमहानगरपालिका–१४ निवासी २६ वर्षीय राजकुमार श्रेष्ठलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरी नायब उपरीक्षक केसीले बताए।
बालकको मृत्यु भएपछि आक्रोशित स्थानीयले दोषीमाथि कारबाही र पीडित परिवारलाई न्याय दिन माग गर्दै कुइरेपानीमा घोराही–लमही सडकखण्ड अवरुद्ध गरेका छन्। सडक अवरुद्ध हुँदा उक्त खण्डको यातायात आवागमन प्रभावित भएको छ।
Discussion about this post