बाँके, कात्तिक १ गते ।
दसैं मनाउन भारतबाट घर फर्किने नेपालीको चाप बढेसँगै बाँकेको नेपाल–भारत सीमा क्षेत्रमा सुरक्षा जाँच कडा पारिएको छ । लागूऔषध ओसारपसार र भन्सार छली नियन्त्रण गर्न नेपालगन्जस्थित एकीकृत जाँच चौकी (आइसिपी) मा ब्राभो र एन्जल नामका दुई तालिमप्राप्त कुकुर परिचालन गरिएको छ ।
सीमा सुरक्षा गुल्म मुख्यालय जमुनाहका प्रमुख सशस्त्र प्रहरी नायव उपरीक्षक जीवनकुमार मल्लले चाडपर्वमा यात्रुको आवागमन बढ्ने भएकाले सुरक्षा निगरानी बढाइएको बताए । उनका अनुसार आइसिपीमा आउने सवारीसाधन, यात्रु र उनीहरूले बोकेका सामान जाँच गर्न कुकुरको समेत सहयोग लिइएको छ ।
भारतका विभिन्न सहरबाट नेपाल आउने नेपाल–भारत मैत्री बसलाई आइसिपीमा रोकेर यात्रु र उनीहरूका सामान जाँच गर्ने गरिएको मल्लले बताए । जाँचका क्रममा लागूऔषध र भन्सार छली गरेर ल्याइएका सामानमाथि विशेष निगरानी राखिएको उनले बताए । ‘यो हाम्रो नियमित जाँच हो । चाडपर्वका बेला अझ व्यापक निगरानी गर्छौं,’ मल्लले भने ।
उनका अनुसार भारततर्फ जाने खाली ट्रक र भारतबाट प्रज्ञापनपत्र नलिई आउने सवारीसाधनमाथि पनि निगरानी बढाइएको छ । आइसिपीका चारवटै गेटमा चौबीसै घण्टा सुरक्षाकर्मी परिचालन गरिएको मल्लले बताए ।
दसैं सुरु भएसँगै जमुनाह नाकाबाट दैनिक १२ हजारभन्दा बढी नेपाली स्वदेश फर्किने गरेको सशस्त्र प्रहरीले जनाएको छ । यात्रुको चाप बढेपछि नाकामा पनि जाँचमा कडाइ गरिएको छ ।
सीमामा भीडभाड बढेकाले आवश्यकताअनुसार तालिमप्राप्त कुकुर परिचालन गरेर जाँच गर्ने गरिएको प्रहरीले जनाएको छ । दसैं र तिहारका बेला सीमा क्षेत्रमा तालिमप्राप्त कुकुर परिचालन गर्ने अभ्यास विगतका वर्षमा पनि हुँदै आएको थियो ।
भारतबाट फर्किने नेपाली यात्रुलाई सहयोग गर्न प्रहरीले जमुनाह नाकामा नागरिक सहायता कक्ष सञ्चालन गरेको छ । स्वदेश फर्किने यात्रुको विवरण संकलन गर्नुका साथै यात्राका क्रममा समस्यामा परेका नागरिकलाई आवश्यक सहयोग उपलब्ध गराउन सहायता कक्ष सञ्चालन गरिएको प्रहरीले जनाएको छ ।
चाडपर्वमा घर फर्किने यात्रुको चाप बढिरहेका बेला सीमा क्षेत्रमा सुरक्षा जाँच र यात्रु सहायताका कामलाई प्राथमिकता दिइएको छ । तालिमप्राप्त कुकुरको परिचालन र सवारीसाधनको जाँचबाट लागूऔषध ओसारपसार तथा भन्सार छली नियन्त्रणमा सहयोग पुग्ने सशस्त्र प्रहरीको अपेक्षा छ ।
Discussion about this post