खोजखबर संवाददाता खड्क सुनार मुगु पुस १३ गते ।
सामाजिक कुप्रथा , कुरीती र अन्धविश्वासको रूपमा रहेको महिला रजस्वला हुँदा गरिने दुब्र्यवहार अर्थात “छुइप्रथा” उन्मुलन गर्न जिल्ला प्रहरी कार्यालय मुगुको अगुवाइमा अभियान शुक्रवार बाट एक कार्यक्रमका बीच सञ्चालन गरिएको छ ।
छुइप्रथाका कारण दिन प्रतिदिन विभिन्न सामाजिक अपराध, महिला तथा बालबालिका माथिको हिंसामा वृद्धि जस्ता विकृति बढेपछि आज जिल्ला प्रशासन कार्यालय मुगु , नागरिक समाज, राजनीतिक दल, सञ्चारकर्मी, स्थानीय तह , र सरोकारवाला निकायको उपस्थितिमा यस्तो अभियान सुरु गरिएको जिल्ला प्रहरी कार्यालय मुगुले जनाएको छ ।
२१ औँ शताब्दिमा पनि महिला माथि छुइ प्रथाका नाममा विभेद र अत्याचार , महिला हिंसा भोग्न बाध्य भईरहेको सन्दर्भमा प्रशासन लगायत अन्य सरोकारवाला सँगको समन्वयमा अभियान सुचारु गरिएको जिल्ला प्रहरी कार्यालय मुगुका प्रहरी नायव उपरिक्षक भुवनेश्वर प्रसाद शाहले बताए । समुदाय प्रहरी साझेदारी कार्यक्रम सञ्चालन भए लगत्तै यो कुप्रथा लाई पनि अभियानको रुपमा लिएको शाहले जानकारी दिए ।
छाउपडि (मासिक स्राव भएका महिलालाई गोठमा पठाउने प्रथा) कुरिति भएको र त्यस्तो कार्य गर्न गराउन निषेध गर्ने गरि २०६३ बैशाख २६ गतेको मन्त्रिपरिषदले निर्णय गरिसकेकाले कोहीकसैले त्यस्तो कार्य गरेमा कानून विपरित हुने प्रमुख जिल्ला अधिकारी जयकुमार घिमिरेले बताए । उनले भने ग्रामिण भेगमा गएर गाउका छुई गोठ सबैको समन्वयमा भत्काउने पनि उनले थपे । यदि यो कुरालाई अटेर गरे कानुनी कार्वाहीको दायरामा ल्याउनु प्रमुख जिल्ला अधिकारी घिमिरेले बताए ।
मुलुकी फौजदारी कार्य्विधि संहिताको दफा १६८ को उपदफा ४ ले महिलाको रजस्वला वा सुत्केरी अवस्थामा छाउपडिमा राख्न नपाइने कानुनी व्यवस्था समेत गरेको छ । त्यस्तै, अन्य कुनै किसिमको भेदभाव वा छुवाछुत वा अमानवीय व्यवहारको कसुर गर्ने व्यक्तिलाई ३ महिनासम्म कैद वा ३ हजार रूपैयाँसम्म जरिवाना वा दुबै सजायँ हुने व्यवस्था कानूनमा उल्लेख छ ।
Discussion about this post