खोजखबर संवाददाता
बाँके पुस २० गते । नेपालगञ्ज विमास्थलमा यतिबेला यात्रुको चाप ह्वात्तै बढेको छ । केही दिनयता चिसो बढेसँगै जहाज चढ्ने यात्रु बढेकाले नेपालगन्ज विमानस्थलमा चाप बढेको हो ।
दशै, तिहारमा जस्तै व्यस्त विमानस्थलमा अहिले दैनिक ५० बढी फ्लाइट भइरहेका छन् ।
नेपालगञ्ज विमानस्थल प्रमुख प्रेमनाथ ठाकुरका अनुसार, दैनिक हवाई जहाज चढेर आवतजावत गर्ने यात्रुको संख्या १२ सयदेखि १५ सयसम्म पुग्ने गरेको छ ।
चिसोका कारण सडक यातायातभन्दा हवाईजहाज रोज्ने बढेका छन् ।
चिसोमा कष्ट र झन्झट हुने भएपछि जहाजमा यात्रा गर्नेको चाप देखिएको ठाकुरले बताउनुभयो । नेपालगन्ज विमानस्थलमा दशैं, तिहार र मानसरोवरको सिजनमा अहिलेको भन्दा यात्रुको चाप धेरै हुन्छ । नेपालगन्ज–काठमाडौं आवातजावत गर्ने यात्रु धेरै छन् । पहाडी जिल्लामा जानेभन्दा बेसी झर्नेको संख्या बढि छ । नेपालगन्ज होलिडेका प्रबन्ध निर्देशक श्रीराम सिग्देलले आयस्रोत बढेसँगै जहाज प्रयोग गर्ने बढेको बताउनुभयो । आन्तरिक हवाई यात्रुजस्तै पश्चिम नेपालमा पर्यटकको चाप बढाउन सके अझ राम्रो हुने उनी बताउँछन् ।
नेपालगन्ज विमानस्थलमा आन्तरिक यात्रुले नै धानेको छ । नेपालगन्ज विमानस्थल आन्तरिक उडानतर्फ धेरै व्यस्त हुने विमानस्थलका रुपमा रहेको छ ।
चिसोमा हवाई उडान अवरुद्ध हुने गरेको छ । तर यसपटक दुई दिनमात्र त्यस्तो समस्या आएको विमानस्थल प्रमुख ठाकुरले जानकारी दिनुभयो । पश्चिम क्षेत्रको सेन्टरमा सबैभन्दा ठूलो र सबैको पहुँचमा रहेका कारण पनि नेपालगन्ज विमानस्थलमा यात्रुको चाप बढेको हो । नेपालगञ्ज विमानस्थलबाट काठमाडौंसहित सुदुपश्चिम र कर्णाली प्रदेशका पहाडी तथा हिमाली जिल्लामा फ्लाइट हुने गरेको छ ।
Discussion about this post