खोजखबर संवाददाता
बाँके पुस २२ गते । एच सी आर सी कप नेपालगंजमा हुने भनिएको एच सी आर सी कप ब्याडमिन्टन टुर्नामेन्टको दोश्रो संस्करण दुई साता पछि सारिएको छ ।
मंगलबार आयोजक संस्था एच सी आर सी अस्पताल नेपालगंजले प्रेस बिज्ञप्ती जारी गर्दै सो जानकारी गराएको छ । यसअघि पौष २४ गतेदेखि ३ दिनसम्म संचालन हुने भनिएको प्रतियोगिता बिद्यार्थीहरुको परिक्षालाई मध्यनजर गर्दै दुई साता सारिएको अस्पतालका ब्यवस्थापक रमेश सिटौलाले जानकारी दिनुभयो । सिटौलाले माघ ९ गतेदेखि माघ ११ गतेसम्म प्रतियोगिता संचालन हुने बताउनुभयो । अस्पतालको स्थापना दिवशको अवसर पारी २०७४ सालदेखि हरेक बर्ष सो प्रतियोगिताको आयोजना हुदैं आएको छ । यसपटक प्रतियोगितामा ६ वटा इभेन्टहरु समावेश गरिएको छ । प्रतियोगितामा जुनियर अण्डर–१३ छात्र, छात्रा, अण्डर १६ छात्र, छात्रा, मिक्स डबल्स र खुल्ला डबल्स गरि ६ वटा इभेन्टहरु रहेका छन । आयोजक संस्थाका अध्यक्ष डा. कुमार शान शाहका अनुसार डबल्स खुल्ला तर्फ प्रथम द्वितीय र तृतीय हुनेलाई नगद क्रमस ४० हजार २० हजार र १० हजार रुपैयाँ पुरस्कार रहेको छ । त्यसै गरि विद्यालय स्तरिय तर्फ विजयी हुने खेलाडीलाई पनि खेल सामाग्री र अन्य आकर्षक पुस्कार प्रदान गरिने आयोजकले जनाएको छ । प्रतियोगितामा सहभागीताका लागि डबल्स खुल्ला टीम तर्फ १५ सय, विद्यालय स्तरीय प्रति खेलाडी २ सय रुपैया र मिक्स डबल्स तर्फ ५ सय रुपैया प्रवेश शुल्क तोकेको अस्पतालका व्यवस्थापक सिटौलाले जानकारी दिनुभयो ।
Discussion about this post