बाँके, असार ८ गते ।
‘माननीय मिना बोहरा सिद्धिकी टी–१० वडा कप क्रिकेट प्रतियोगिता–२०८३’ को उपाधि नेपालगन्ज उपमहानगरपालिका–१२ नम्बर वडाले जितेको छ। नेपालगन्जस्थित मंगलप्रसाद माध्यमिक विद्यालयको खेल मैदानमा आइतबार सम्पन्न फाइनल खेलमा वडा नम्बर २३ लाई पराजित गर्दै वडा नम्बर १२ च्याम्पियन बनेको हो।
उपाधिसँगै विजेता वडा नम्बर १२ ले नगद ३ लाख रुपैयाँ, ट्रफी र प्रमाणपत्र प्राप्त गरेको छ। उपविजेता बनेको वडा नम्बर २३ ले नगद २ लाख रुपैयाँसहित ट्रफी र प्रमाणपत्र हात पारेको छ।
विजेता तथा उपविजेता टोलीलाई कार्यक्रमका प्रमुख अतिथि तथा मिना बोहरा सिद्धिकी, लुम्बिनी प्रदेशका पूर्वसांसद मोहम्मद याकुव अन्सारी, नेपाली कांग्रेस बाँकेका सचिव शुधान्सु कोइराला तथा नेपाल क्रिकेट संघ बाँकेका अध्यक्ष सुफियान खान लगायतले पुरस्कार वितरण गरेका थिए।
फाइनलमा वडा नम्बर १२ को जितमा राम आर्य र श्याम आर्यको प्रदर्शन निर्णायक बनेको थियो। उत्कृष्ट खेल प्रदर्शनका कारण श्याम आर्य ‘प्लेयर अफ द म्याच’ घोषित हुँदै नगद २ हजार ५ सय रुपैयाँबाट पुरस्कृत भए भने राम आर्य ‘टर्निङ प्वाइन्ट अफ द म्याच’ घोषित हुँदै नगद १ हजार रुपैयाँ प्राप्त गर्न सफल भए। राम–श्यामको प्रभावशाली जोडीले टोलीलाई उपाधिसम्म पु¥याउन महत्वपूर्ण भूमिका खेलेको आयोजकले जनाएको छ।
प्रतियोगिताको सर्वोत्कृष्ट खेलाडी (प्लेयर अफ द टुर्नामेन्ट) वडा नम्बर १२ का कप्तान गौतम कनोजिया घोषित भए। उनले नगद ३० हजार रुपैयाँ प्राप्त गरे। वडा नम्बर ११ का सलाउद्दिन खान ‘बेस्ट ब्याटर’ घोषित हुँदै नगद २५ हजार रुपैयाँबाट सम्मानित भए भने वडा नम्बर २३ का कप्तान हसिब अन्सारी ‘बेस्ट बलर’ घोषित हुँदै नगद २५ हजार रुपैयाँ प्राप्त गरे।
वडा स्तरमा हालसम्म सञ्चालन भएका क्रिकेट प्रतियोगितामध्ये यो सर्वाधिक पुरस्कार राशिको प्रतियोगिता भएको आयोजकको दाबी छ। लुम्बिनी प्रदेश सरकारअन्तर्गत सामाजिक विकास डिभिजन कार्यालय बाँकेको आर्थिक सहयोगमा ज्योति स्पोट्र्स एकेडेमीले प्रतियोगिता आयोजना गरेको हो।
समाजसेवी असफाक अन्सारीको विशेष पहलमा लुम्बिनी प्रदेश सांसद मिना बोहरा सिद्धिकीले प्रतियोगिताका लागि २० लाख रुपैयाँ बजेट विनियोजन गरेकी थिइन्।
लेदर बल प्रयोग गरी नकआउट आधारमा सञ्चालन गरिएको प्रतियोगितामा नेपालगन्जका २३ वडामध्ये १९ वडाको सहभागिता रहेको थियो। प्रतियोगिताले स्थानीय स्तरमा क्रिकेटको विकास, प्रतिभा पहिचान र खेलप्रतिको आकर्षण बढाउन महत्वपूर्ण योगदान पु¥याएको सहभागीहरूले बताएका छन्।
Discussion about this post