बाँके, असार ८ गते।
लुम्बिनी प्रदेशका आन्तरिक मामिला तथा कानुनमन्त्री भण्डारीलाल यादवले नेपालगन्जस्थित साबिक मध्यपश्चिमाञ्चल क्षेत्रीय खेलकुद विकास समितिअन्तर्गत रहेका खेलकुद संरचनाको निरीक्षण तथा अनुगमन गरेका छन्।
आइतबार मन्त्री यादवले नेपालगन्ज रंगशाला परिसरभित्र रहेको पौडी पोखरी, कभर्ड हल, सुटिङ रेन्जलगायत विभिन्न खेलकुद पूर्वाधारको स्थलगत निरीक्षण गरेका हुन्।
निरीक्षणका क्रममा समितिका कार्यालय प्रमुख महेश चन्दले खेलकुद संरचनाको संरक्षण, वर्तमान अवस्था, चुनौती तथा सम्भावनाबारे मन्त्री यादवलाई जानकारी गराएका थिए।
त्यसैगरी समितिका प्राविधिक सल्लाहकार फरमान अली सिद्दिकी (सोनु)ले स्थानीय तह, प्रदेश सरकार र खेलकुद निकायबीच प्रभावकारी समन्वयको अभावका कारण खेलकुद क्षेत्रले अपेक्षित गति लिन नसकेको धारणा व्यक्त गरे।
लुम्बिनी प्रदेश खेलकुद परिषद्का पूर्व सदस्य नरेन्द्र थापाले खेलाडी उत्पादन तथा खेलकुद क्षेत्रको दीर्घकालीन विकासका लागि प्रतिभा पहिचान अभियान सञ्चालन, नियमित प्रतियोगिता आयोजना तथा खेल सामग्री व्यवस्थापनमा प्रदेश सरकारले विशेष ध्यान दिनुपर्ने बताए। उनले यस विषयमा आवश्यक पहल गरिदिन मन्त्री यादवसँग आग्रहसमेत गरे।
मन्त्री यादवले बाँके जिल्लाको खेलकुद क्षेत्रको संरक्षण, प्रवद्र्धन र विकासका लागि आफूले सक्दो पहल गर्ने प्रतिबद्धता व्यक्त गरे। उनले आवश्यक स्रोत–साधन व्यवस्थापनका लागि आफ्नो संसदीय विकास कोषका साथै सम्बन्धित मन्त्रालय र प्रदेश सरकारसँग समन्वय गरी अघि बढ्ने बताए।
उनले खेलकुद पूर्वाधारको संरक्षणसँगै खेलाडीको क्षमता विकास र खेल गतिविधिको विस्तारमा समेत प्रदेश सरकारले प्राथमिकता दिनुपर्नेमा जोड दिएका छन्।
Discussion about this post