२१ औं शताब्दीमा पनि महिलामाथिको हिंसा अन्त्य हुन सकेन: सरोकारवाला
बाँके फागुन २५ गते ।
अन्तर्राष्ट्रिय श्रमिक महिला दिवसको अवसरमा आइतबार नेपालगञ्जमा न्यायिक अवस्था र सरोकारवालाको भूमिका विषयक अन्तरक्रिया कार्यक्रम गरिएको छ । “समानताको पुस्ताः अन्त्य गरौ, हिंसा, विभेद र असमानता“ भन्ने नाराका साथ आज बिश्वभर ११० औं अन्तर्राष्ट्रिय नारी दिवस बिभिन्न कार्यक्रम गरी मनाइएको छ । अन्तरक्रिया कार्यक्रममा बोल्ने वक्ताहरुले महिलाको साभागिता नारामा मात्र सिमित भएकोले व्यहारमा कार्यान्वयन गर्नुपर्नेमा जोड दिएका छन् । महिलाले गर्ने श्रमको सम्मान हुन नसकेको प्रति चिन्ता व्यक्त गर्दै वक्ताहरुले महिला र पुरुषबीचमा रहेको बिभेदलाई अन्त्य गर्नसके मात्र समान समानता हुने धारणा राखेका थिए ।
२१ औं शताब्दीमा आइपुग्दा समेत महिलामाथिको हिंसा, विभेद र असमानताको अन्त्य हुन नसकेकोमा दुःख व्यक्त गरेका थिए । महिलाले पनि पुरुष जतिको श्रम गरेपनि सो अनुसार ज्याला समेत पाउन नसकेको वक्ताहरुको भनाई थियो । बाँकेमा रहेमा विभिन्न संघ संस्थाको समन्वय सहकार्यमा नेपालगञ्ज उपमहानगरपलिकाले आयोजना गरेको अन्तरक्रिया कार्यक्रममा जिल्ला न्यायधीश मनकुमारी जिएम, नेपालगञ्ज उपमहानगरपालिकाकी उपमेयर उमा थापा मगर र जिल्ला प्रहरी कार्यालय बाँकेका प्रमुख एव प्रहरी उपरिक्षक बीर बहादुर ओली लगायतले धारणा राख्नुभयो ।
Discussion about this post