बाँके चैत १५ गते । कोरोना भाइरसको संक्रमणबाट बच्न तथा प्रभावकारी व्यवस्थापनका लागि बाँके डुडुवा गाउँपालिकाले ११ बेडको क्वारेन्टाइन तयार गरेको छ । गाउँपालिकाको वडा नम्बर २ स्थित बेतहनी स्वास्थ्य चौकीमा आज शनिबार ११ शैययाको क्वारेन्टाइन तयार गरिएको गाउँपालिका स्वास्थ्य शाखा संयोजक धनबहादुर बुढाले बताउनुभयो । उहाँका अनुसार क्वारेन्टाइनमा बेडसंगै साबुन पानी, सेनीटाइजर, हैण्डवास, डस्टीन, सामान्य औषधी लगायत चाहिने आधारभुत कुराहरुको समेत व्यवस्थापना गरिएको छ । गाउँपालिकामा ३० बेडको क्वारेन्टाइन बनाउने लक्ष्य अनुसार गाउँपालिकाको वडा नं. ४ कम्दीस्थित आधारभुत विद्यालय शाहपुर्वा र वार्ड नंं. ६ हिरिमिनियामा आवश्यकता अनुरुप थप १०–१० बेडको क्वारेन्टाइन तयार गरिने छ । गाउँपालिका सिमासंग जोडिएकाले भारतबाट समेत मानिसहरु आउने भएकाले र सरकारको निति अनुसार क्वारेन्टाईन तयार गरिएको गाउँपालिका अध्यक्ष नरेन्द्रकुमार चौधरीले बताउनुभयो । अहिले गाउँपालिकामा स्वास्थ्य सरसफाई तथा जोखिमबाट बच्नका लागि उच्च सर्तकता अपनाउन र घरबाहिर ननिस्कनका लागि सचेतनामुलक सन्देशसहितको माइकिङ्गको कार्य भईहेको छ । अध्यक्ष चौधरीले सम्पुर्ण गाउँबासीलाई अत्यावश्यक अवस्था बाहेक घर बाहिर ननिस्कन आग्रह गर्दै गाउँबासीलाई सन्देश समेत दिनुभएको छ । कोरोनाबाट उत्पन्न जटिल समस्याको व्यवस्थापन तथा कार्यन्वयनका लागि गाउँपालिकाले रु ७ लाखको आकस्मिक कोष स्थापना गरेको छ ।
Discussion about this post