बाँके चैत १५ गते । नेपालगन्जको रानीतलाउ सब्जी मण्डी अव विहान ६ बजेदेखि दिउँसो ३ बजेसम्म मात्र खुल्ने भएको छ । कोरोना भाइरसको संक्रमण नफैलियोस भन्ने उद्देश्यले रानीतलाउनलाई व्यवस्थित गर्ने निर्णय भएको नेपालगन्ज उपमहानगरपालिकाका मेयर डाक्टर धवल शम्शेर राणाले जानकारी दिनुभयो । उहाँका अनुसार, तरकारी मण्डीमा हुने भीडभाडलाई नियन्त्रण गर्न यस्तो निर्णय भएको पनि उहाँले बताउनुभयो । आवश्यकता अनुसार, नगरका मुख्य मुख्य टोल तथा चोकहरुमा ठेला मार्फत् विक्री गर्ने व्यवस्था रानीतलाउ कृषि उपज व्यवस्थापन समितिले गर्ने भएको छ ।
ठेला विक्रेताले मूल्य सूचि, फोटो सहितको परिचयपत्र अनिवार्य राखि एक ठेलादेखि अर्को ठेलाको दूरी एक सय मिटर कायम गर्ने गरी विक्री वितरण गर्नुपर्ने छ । त्यस्तै खाद्य तथा किराना पसलहरुको हकमा पनि मूल्य सूचि स्पष्ट देखिने गरी विहान ७ बजेदेखि बेलुका ५ बजेसम्म विक्री गर्नुपर्ने निर्णय पनि नेपालगन्ज उपमहानगरपालिकाको उपभोक्ता हित संरक्षण समितिको आज बसेको बैठकले गरेको छ । पिउने पानीको जार मार्फत् आपूर्ति गर्दा संक्रमण फैलिने जोखिम भएकाले सरसफाईमा बिशेष ध्यान दिन पानी उत्पादन कम्पनीहरुको ध्यानाकर्षण बैठकले गरेको छ ।
Discussion about this post