भिष्म लोध बाँके चैत २० गते । नेपाल भारत सीमा नाकामा पाँच दिनदेखि अलपत्र १८१ जना नेपालीलाई दशगजामै निर्माण गरिएको अस्थायी क्वारेन्टाइनमा राखिएको छ । पाँच दिनदेखि नाकामा अलपत्र उनीहरुलाई नेपाल ल्याउन नसकिएपछि बिहीबार दशगजामै टेन्टाको अस्थायी क्वारेन्टाइन निर्माण गरि राखिएको हो । उनीहरु गत सोमबार राती नेपालगञ्ज नाकामा आइपुगेका थिए । भारतको बिभिन्न ठाउँमा काम गर्न गएका उनीहरु कोरोना भाइरसको संक्रमण त्रास तथा लकडाउनका कारण आफ्नै नेपाल फर्किएका थिए । नाकामा आइपुगेका उनीहरुलाई नेपाल प्रवेश पाएका थिए । सो अवस्थामा एक रात भारतीय क्षेत्रमै खुल्ला आकाशमुखि काट्न प¥यो । लकडाउनका कारण खानेकुराका व्यवस्था नभएपछि उनीहरुलाई स्थानीय प्रहरी र युवाहरुले पहिलो दिन खाना खुवाएका थिए ।
नेपाल प्रवेश पाउने आदेश नभएपछि भारतीय प्रहरीले राती नै उनीहरुलाई खुल्ला नाका भएर नेपाल भगाएको थियो । अलपत्र परेका उनीहरु दशगजामै अलपत्र परेपछि नेपालगञ्ज उपमहानगरपालिकाको सक्रियतामा दुई दिन उनीहरुलाई खाना पानीको व्यवस्था गरियो । बुधबार नेपाल प्रवेश गरिसकेका उनीहरुलाई नेपाल–भारतका सुरक्षा अधिकारीको छलफलपछि भारतमै क्वारेन्टाईनमा राख्ने सहमति भएको थियो । तर नेपाली नागरिकहरुले कुनैपनि हालतमा भारतीय क्वारेन्टाईनमा नजाने र आफ्नो देशमा प्रवेश गर्न पाउनुपर्ने माग गर्दै नाराबाजी समेत गरेका थिए । भारतमा जान नमानेपछि उनीहरुलाई दशगजा क्षेत्रमै टेन्ट लगाएर अस्थायी क्वारेन्टाइन निर्माण गरेर राखिएको बाँकेको सहायक प्रमुख जिल्ला अधिकारी दिर्घराज उपाध्यायले जानकारी दिनुभयो । क्वारेन्टाईनमा बाँकेका २७, बर्दियाका १४, दाङका ३१, सल्यानका ९, जुम्लाका १५, सुर्खेतका ७, डोल्पाका ३, अछामका ५, प्युठानका २, रोल्पाका १३, रुकुमका १०, सप्तरीका १, उदयपुरका १, स्याङ्जाका २, दैलेखका १०, झापाका ५, रुपन्देहीका १, नवलपरासीका २, मुगुका २ र अर्घाखाँचीका १ जना रहेका छन ।
Discussion about this post