बाँके, जेठ १८ गते ।
युवापुस्तामा बढ्दो लागूऔषध दुव्र्यसनको जोखिम न्यूनीकरण गर्ने उद्देश्यले नेपालगन्ज उपमहानगरपालिका–१९ को आर्थिक सहयोग तथा बालकल्याण तथा सामुदायिक विकास संघ, बाँकेको आयोजनामा सञ्चालित दुईदिने लागूऔषध दुव्र्यसनविरुद्धको सचेतनामूलक कार्यक्रम सम्पन्न भएको छ।
कार्यक्रम अन्तर्गत आइतबार नेपाल राष्ट्रिय माध्यमिक विद्यालय, कण्ठीपुर तथा सोमबार जगतज्योति माध्यमिक विद्यालय, बासुदेवपुरमा कक्षा ८, ९ र १० मा अध्ययनरत विद्यार्थीहरूलाई लागूऔषधको असर, यसको दुरुपयोगबाट हुने क्षति तथा बच्ने उपायबारे जानकारी गराइएको थियो।
कार्यक्रममा संघका अध्यक्ष तथा प्रशिक्षक वसन्त कनौजियाले लागूऔषध उपचारका लागि प्रयोग गरिएमा लाभदायक भए पनि दुव्र्यसनका रूपमा प्रयोग गर्दा व्यक्तिको स्वास्थ्य, परिवार र भविष्यमा गम्भीर असर पार्ने बताए। उनले लागूऔषधको लतले व्यक्तिलाई सामाजिक, आर्थिक तथा नैतिक रूपमा कमजोर बनाउँदै अन्ततः विनाशतर्फ धकेल्न सक्ने उल्लेख गरे।
अर्का प्रशिक्षक तथा संघका कोषाध्यक्ष अरुणकुमार सिंहले लागूऔषध सेवनले मानव शरीरको केन्द्रीय स्नायु प्रणालीमा प्रत्यक्ष असर पार्ने र व्यक्तिको व्यवहार, सोचाइ तथा दैनिक जीवनशैलीमा नकारात्मक परिवर्तन ल्याउने जानकारी दिए। उनका अनुसार लागूऔषधको लतले व्यक्तिलाई आपराधिक गतिविधितर्फ समेत उन्मुख गराउन सक्छ।
सिंहले लागूऔषध (नियन्त्रण) ऐन, २०३३ अनुसार गाँजा, अफिम, कोकाको झार तथा पात, मनोद्विपक पदार्थलगायत नेपाल सरकारले राजपत्रमार्फत तोकेका प्राकृतिक तथा कृत्रिम लागूऔषधहरू कानुनद्वारा नियन्त्रित पदार्थ भएको स्पष्ट पारे।
नेपालगन्ज उपमहानगरपालिका–१९ का कार्यवाहक अध्यक्ष रामसुहावन वर्माको प्रमुख आतिथ्यतामा सम्पन्न कार्यक्रममा महिला, बालबालिका तथा ज्येष्ठ नागरिक सेवा केन्द्रकी प्रहरी निरीक्षक ज्ञानुमाया थनेतले लागूऔषध प्रयोग, ओसारपसार तथा कारोबारमा संलग्न व्यक्तिलाई कानुनअनुसार हुने कारबाहीबारे जानकारी दिइन्। उनले लागूऔषध दुव्र्यसनले व्यक्तिको स्वास्थ्य, सामाजिक प्रतिष्ठा र आर्थिक अवस्थामाथि गम्भीर असर पार्ने भएकाले यसबाट टाढा रहन विद्यार्थीहरूलाई आग्रह गरिन्।
कार्यक्रममा बालकल्याण तथा सामुदायिक विकास संघका सचिव पूरनबहादुर थारु, कार्यपालिका सदस्य मुजम्मिल हुसैन, जगतज्योति माध्यमिक विद्यालय व्यवस्थापन समितिका सल्लाहकार हेमबहादुर केसी, सहायक प्रधानाध्यापक ज्ञानेन्द्रप्रसाद आचार्य, नेपालगन्ज–१९ बासुदेवपुर स्वास्थ्य चौकीका सि.अ.हे.व. किरण चौधरी, शिक्षक–शिक्षिका तथा विद्यार्थीहरूको उल्लेखनीय सहभागिता रहेको थियो।
दुवै कार्यक्रमको अध्यक्षता बालकल्याण तथा सामुदायिक विकास संघका अध्यक्ष वसन्त कनौजियाले गरेका थिए। आयोजकका अनुसार विद्यार्थीहरूलाई लागूऔषध दुव्र्यसनबाट जोगाउँदै सचेत, जिम्मेवार र स्वस्थ समाज निर्माणमा योगदान पु¥याउने उद्देश्यले कार्यक्रम सञ्चालन गरिएको हो।
Discussion about this post