जीवन ज्योति क्वारेन्टाइनमा बसेकाहरुको स्वाब संकलन गर्दै स्वास्थकर्मी ।
सुर्खेत बैशाख १ गते । सुर्खेतको चौकुने गाउँपालिकाको क्वारेन्टाइनमा बसेका १४ जनाकै रिर्पोट ‘नेगेटिभ’ आएको छ । चैतको दोस्रो हप्तादेखि केही दिनअघिसम्म भारतबाट आएकालाई चौकुने गाउँपालिका ६ गुटुमा निर्माण गरिएको जीवन ज्योती स्कुलको क्वारेन्टाइनमा राखिएको थियो ।
क्वारेन्टाइनमा राखिएका सबैको कोरोना परीक्षण रिर्पोट ‘नेगेटिभ’ आएपछि सोमबार घर पठाइएको गाउँपालिकाका अध्यक्ष धीरबहादुर शाहीले जानकारी दिए । क्वारेन्टाइनमा भारतबाट आएका चार जना युवा र केही दिनअघि गौरीफन्टा नाकाबाट भित्रिएका १० जना गरी १४ जना थिए ।
भारतबाट आएका कैलालीका दुई युवामा कोरोना संक्रमण पुष्टि भएपछि गौरीफन्टा नाकाबाट आएका १० जनासँगै १४ जनाकै स्वास्थ्य परीक्षण गरिएको थियो । स्वाब संकलन गरेर काठमाडौँको राष्ट्रिय जनस्वास्थ्य प्रयोगशाला टेकुमा गरिएको परीक्षण रिर्पोट नेगेटिभ आएपछि सोमबार घर पठाइएको अध्यक्ष शाहीले बताए ।
उनीहरुलाई अझै एक हप्ता घरमै होम क्वारेन्टाइनमा बस्न भनिएको छ । यसबीचमा पनि कुनै लक्षण देखिए तुरुन्तै क्वारेन्टाइनमा आउन पनि आग्रह गरिएको छ । चौकुनेमा अहिलेसम्म ४ सय २१ जना भित्रिएकामा १४ जनाको परीक्षण भएको हो । बाँकी होम क्वारेन्टाइनमै बसेका कसैलाई पनि कोरोनाका लक्षण नदेखिएको बताइएको छ ।
अहिलेसम्म कर्णाली प्रदेशमा कसैलाई कोरोना संक्रमण देखिएको छैन । सुदुरपश्चिम प्रदेशसहित नेपालभर भने १४ जनामा कोरोना संक्रमण पुष्टि भएको छ । एक जना उपचारपछि घर फर्किदा बाँकी १२ जनाको विभिन्न अस्पतालमा उपचार भइरहेको छ ।
Discussion about this post