काठमाडौं बैशाख ३ गते । खुला सीमा नाकाबाट कोरोना भाइरस फैलिने खतरा बढेको भन्दै थप सुरक्षाकर्मी परिचालन गर्न राष्ट्रिय जनता पार्टी (राजपा) ले सरकारसँग माग गरेको छ।
बुधबार एक विज्ञप्ति जारी गर्दै भारतको नाम नलिई त्यसतर्फका नाकामा थप कडाइ गर्न सरकारलाई राजपाले आग्रह गरेका हुन् ।छिमेकी मुलुक भारतमा कोरोनाले महामारीको रूप लिइरहेका बेला राजपा संयोजक शरतसिंह भण्डारीलेथप सुरक्षा गर्नुपर्ने माग राखेका थिए ।
‘छिमेकी मुलुकहरूमा कोरोना भाइरसको संक्रमण तीव्र गतिमा बढिरहेकाले खुला सीमानामा अझ निगरानी बढाउनु पर्ने भएकाले व्यापक रूपमा सुरक्षाकर्मी परिचालन गरी आवतजावतलाई कडाइका साथ रोक्नु पर्दछ,’ राजपा संयोजक भण्डारीद्वारा बुधबार सरकारलाई दिइएको चारबुँदे सुझावको तेस्रो बुँदामा भनिएको छ ।
भारतसँगको सीमा विवाद, उसले खडा गरेका बाँधका कारण तराई तथा मधेसका क्षेत्रमा हुने डुबानलगायतमा मौनता साध्ने गरेको आरोप खेप्दै आएको राजपाले भारतमा कोरोना कहर बढिरहेका बेला नाका कडाइ गर्न माग गरेको हो ।
राजपाले उपत्यकाबाट नागरिक बाहिरिएपछि कतिपय स्थानमा झडपको अवस्थासमेत सिर्जना भएको भन्दै यसप्रति गम्भीर बन्न पनि सरकारलाई भनेको छ ।
लकडाउनपछि उपत्यकालगायत देशका विभिन्न भागमा मानिसहरू अलपत्र परेका छन् । त्यस्ता नागरिकका लागि सम्बन्धित वडाबाट तत्काल राहतको व्यवस्था मिलाउन पनि राजपाले माग गरेको छ । यसबारे पटक–पटक सरकारले निर्णय गरे पनि त्यसको कार्यान्वयन प्रभावकारी नभएको राजपाको मत छ ।
स्वास्थ्यकर्मीहरूलाई आवश्यक तत्काल स्वास्थ्य सामग्री उपलब्ध गराउन पनि सिंहले माग गरेका छन् । कोरोनाविरुद्ध लड्न सिंहो देश एक ठाउँमा उभिनुपर्ने आवश्यकता औंल्याउँदै सिंहले लकडाउनको नियम पालना गर्न सबैलाई सुझाएका छन् ।
Discussion about this post