बाँके बैशाख ३ गते । लकडाउनका कारण दैनिक ज्यालामजदुरी गरेर जीविकोपार्जन गर्ने परिवारका लागि खजुरा गाउँपालिका २ ले केही दिनअघि राहत बाँड्यो । वडा कार्यालयले वितरण गरेको राहत वास्तविक पीडितले भन्दा गैरपीडितले पाएको भन्दै सर्वत्र आलोचना भयो । स्थानीयका अनुसार, वडा कार्यालयले गरीव विपन्न र असहायलाई नभएर आफन्त र कार्यकर्तालाई राहत बाँड्दा विबाद भएको हो । स्थानीय रामबहादुर महतराका अनुसार, वडाले राहत वितरण पारदर्शी तरिकाले वितरण नगरी आफूखुसी बाँडेर अनियमिता गरेको आरोप लगाउनुभयो । यस्तै नेपालगन्ज उपमहानगरपालिका ४ को वडा कार्यालयमा राहत वितरणमा पक्षपात गरेको भन्दै स्थानीयले तालाबन्दी नै गरिदिएका छन् । यो त प्रतिनिधिमूलक घटना मात्र होे, राहत वितरणमा बाँकेका अधिकांश ठाउँमा अनियमितता भइरहेको छ । जिल्लाका आठवटै स्थानीय तहले वितरण गरेको राहत वास्तविक पीडितसम्म पुग्न सकेको छैन् । साँझ विहानको छाक टार्नै मुस्किल परेका पीडितहरुलाई राहत दिनुको साटो नातावाद, कृपावादमा राहत बाँड्न थालेपछि जिल्लाका अधिकांश ठाउँमा विवाद भइरहेको छ । सांसददेखि, स्थानीय सरकार, संघसंस्थालगायतले राहतमा मनोमानी गर्दै आएका राजनीतिक दलका एकजना नेता मेराज अहमद हल्वाई हिमालयले बताउनुभयो ।
उहाँले भन्नुभयो, राहत आवश्यकताका आधारमा वितरण गर्नुपर्ने हो, यहाँ त को आफ्नो मान्छे हो, त्यसलाई मात्र छानिछानी वितरण गरिएको छ । राहत वितरणलाई एकद्धार प्रर्णालीबाट लैजाने निर्णय प्रमुख जिल्ला अधिकारी कुमारबहादुर खड्का संयोजकत्वको टास्कफोर्स समितिले गरेको थियो । तर उक्त समिति निकम्मा जस्तै बनेको छ । न राहत वितरणको अनुगमन गर्ने गरेको छ न त राहत वितरणलाई व्यवस्थित गर्न पहल नै गरेको छ ।
Discussion about this post