सुर्खेत बैशाख ५ गते । कर्णाली प्रदेश सरकारले नेपाल सरकारले जारी गरेको लकडाउनलाई थप कडाई गर्ने निर्णय गरेको छ । शुक्रबार बसेको कर्णाली प्रदेश सरकारको मन्त्रिपरिषद बैठकले लकडाउन उल्लंघन बढेर मानिसहरु पैदलै घर जान आउन थालेको, सीमामा कमजोर सुरक्षा व्यवस्थाका कारण जोखिम बढेकाले लकडाउनलाई थप कडाई गर्न केन्द्र सरकारलाई अनुरोध गर्ने निर्णय गरेको हो । तर यो निर्णय अहिले लकडाउनका कारण काठमाडौँ लगायत कर्णाली बाहिर रहेका कर्णालीबासीका लागि पीडाको विषय हो । उनीहरुको उद्धार र क्वारेन्टाइन व्यवस्थापनका विषयमा कर्णाली प्रदेश सरकारले कुनै पहल र निर्णय गर्न भने सकेन । साथै बैठकले कर्णाली प्रदेश सभाको पाँचौं अधिवेशन शुक्रवार रातीदेखि अन्त्य गर्न प्रदेश प्रमुखलाई आग्रह गर्ने, स्थानीय संघ संस्थाले दिने राहत पालिकामार्फत मात्रै वितरण गर्न पाउने व्यवस्था गर्ने निर्णय पनि गरेको छ । साथै आवागमनको कारणबाट कोरोनाको सामुदायिक संक्रमणको सम्भावना रोकथामका लागि जो जुन ठाउँ भएपनि त्यही बसाल्ने र व्यवस्थापन गर्ने निर्णय गरेको छ । यसका लागि सम्बन्धित निकाय, प्रदेश सरकार र पालिका सरकारलाई आग्रह गर्ने पनि कर्णाली प्रदेश सरकारका प्रवक्ता विमला केसीले जानकारी दिइन ।
Discussion about this post