बाँके बैशाख ८ गते । भारतबाट निर्वाधरुपमा आउने गरेका सवारीसाधनले कोरोना भाइरस फैलिने उच्च जोखिम देखिएको छ । सीमा नाकाबाट दैनिक उपभोग्य र अत्यावश्यकीय वस्तु बोकेर मालबाहक सवारी ल्याउने चालक र सहचालकको स्वास्थ्य अवस्थाको जाँच नै नगरी दैनिक सरदर ८० देखि सय सवारीसाधन सामान बोकेर काठमाण्डौंसम्म पुग्ने गरेका कारण कोराना फैलिने जोखिम बढेकोे छ । लकडाउन सुरु भएयता भारतबाट मालबाहक गाडी लिएर दैनिक ५० देखि ७० चालक र सहचालक नेपालगन्जको जमूनाह नाकाबाट नेपाल प्रवेश गरिरहेका छन् । यस्तै विराटनगर, भैरहवा, महेन्द्रनगर र विरगन्ज नाकाबाट सयौ मालबाहक सवारी लिएर चालक र सहचालक निर्वाधरुपमा नेपाल आइरहेका छन् । सीमादेखि काठमान्डौंसम्म पुग्ने यि चालकको धेरैजनासँग सम्पर्क हुन्छ । भारतमा कोरोना संक्रमण फैलिएका कारण यिनै चालक र सहचालकहरुबाट नेपालमा पनि कोरोना संक्रमण फैलिने जोखिम उच्च रहेको चिकित्सकहरु बताउँछन् । मालबाहक सवारी लिएर नेपालगन्जको जमूनाह नाका आएका चारजना चालक र सहचालकलाई आइतवार साँझ भारत फिर्ता पठाइएको छ । उनीहरुको तापक्रम १ सय २ डिग्रीमाथि मापन भएपछि फिर्ता पठाईएको जमुनाह प्रहरीले जनाएको छ । जमुनाह प्रहरी चौकीका इन्चार्ज माधव रिजालका अनुसार, यसरी भारतबाट भित्रिने गाडीलाई सेनिटाइजर गर्ने र चालक सहचालकको तापक्रम मापन गरेर नेपाल प्रवेश गर्न दिने गरिएको छ । यसरी दैनिक आउने सवारीका चालक र सहचालकमध्ये कसैलाई सक्रमण भएको छ र उसलाई नाकामा ज्वरो नआएको अवस्थामा उसले निर्वाधरुपमा विभिन्न ठाउँ घुम्ने र धेरैलाई भाइरस सार्ने जोखिम देखिएको छ । त्यसैले सवारीसाधनमा रसायनयुक्त पानी छर्किदैमा र चालकसहचालकको तापमापन गर्दैमा जोखिम टर्ने होइन अन्य सुरक्षात्मक उपाय अप्नाउन जरुरी देखिएको छ ।
Discussion about this post