खोजखबर संवाददाता
बाँके साउन २५ गते । संघिय सरकारका शहरी विकास मन्त्री मोहम्मद इस्तियाक राइले छाडा गाईको संरक्षण, नियन्त्रण तथा ब्यवस्थापनकालागि १ करोड रुपौयाँ उपलब्ध गराउने प्रतिवद्धता जनाएका छन । शनिबार गृह जिल्ला बाँकेको नेपालगन्ज पुगेका मन्त्री राइले गाई बचाउ अभियान संचालन गरिरहेका स्थानिय युवाहरुलाई भेटी छाडा चौपाया गाईको संरक्षण र उचित ब्यवस्थापनकालागि संसदीय कोषबाट १ करोड रकम उपलब्ध गराउने प्रतिवद्धता जनाएका हुन ।
गाई नेपालको राष्ट्रिय जनावर भएको उल्लेख गर्दै मन्त्री राइले नेपालगन्ज उपमहानगरपालिकाले गाई संरक्षणकालागि दिर्घकालीन योजना ल्याएको खण्डमा तत्काल १ कारोड बजेट बिनियोजन गरिने बताए । त्यसकालागि नगरपालिकालाई दिर्घकालीन योजना सहितको कार्यक्रम ल्याउन समेत मन्त्री राइले आग्रह गरेका छन ।
यसैबिच नेपालगन्जमा सामाजिक संजालमार्फत गाई बचाउ अभियान संचालन गर्दै आएका अभियन्ताद्वय समिरमान श्रेठ तथा बिवेक श्रेठलाई मन्त्री राईले ५० हजार नगद पनि उपलब्ध गराएका छन । काञ्जी हाउसमा रहेका गाईहरुको आहारा ब्यवस्थापनकालागि मन्त्री राइले उक्त रकम उपलब्ध गराएको गाई संरक्षण अभियन्ता बिवेक श्रेष्ठले जानकारी दिए ।
छाडा गाई व्यवस्थापनका लागि कान्जी हाउस बनाएर त्यहाँ गाई गोरु राखिएपनि उनिहरुको खानपिनको र राम्रो संरक्षणको व्यवस्था उपमहानगरपालिकाले गर्न नसक्दा पछिल्लो समयमा विभिन्न संघसंस्था तथा युवाहरुले गाईलाई खान खुवाउने लगायतका काम गरिरहेका छन् ।
सामाजिक सञ्जाल मार्फत उनिहरुलले गाई संरक्षण र उनिहहरुको आहारा व्यवस्थापनको सार्वजनिक रुपमै आह्वान समेत गरेका थिए ।
यसैविच मन्त्री राइले शनिवार नै नेपालगन्जको भेरी अस्पतालमा निर्माण गर्न लागिएको ५०० शैयाको अत्याधुनिक भवनको समेत अनुगमन गरेका छन भने समाजवादी पार्टीले आयोजना गरेको रक्तदान कार्यक्रममा समेत सहभागि भएका थिए ।
Discussion about this post