काठमाडौं बैशाख २१ गते ।
सचिवालय बैठकमा आत्मालोचना गरेपछि नेकपाका अध्यक्ष तथा प्रधानमन्त्री केपी शर्मा ओलीको कुर्सी जोगिएको छ । शनिबार बसेको सचिवालय बैठकमा प्रधानमन्त्री ओलीले आत्मालोचना गरे भने नेताहरुको माग अनुसार बैशाख २५ गते स्थायी समिति बैठक बोलाएका छन ।
जुन उनको तत्कालिन सत्ता मात्रै नभई बाँकी २ बर्षका लागि पार्टी अध्यक्ष पद पनि जोगिएको छ । स्थायी समिति बैठकलाई अर्का अध्यक्ष प्रचण्डसँग मिलेर सामना गर्ने र स्थायी समितिमा पनि आत्मालोचनासहित प्रस्तुत भएको खण्डमा पाँच बर्ष नै ओली प्रधानमन्त्री र नेकपाको अध्यक्ष रहने अवस्था सिर्जना भएको नेकपाका एक नेताले बताए ।
ओलीले युटर्न लिनुपूर्व अर्का अध्यक्ष प्रचण्ड, राष्ट्रपति विद्यादेवी भण्डारी र उपाध्यक्ष बामदेव गौतमसँग गम्भिर परामर्श गरेका थिए । बामदेवसँग परामर्श गरेका उनले सचिवालयमा बहुमत पनि पुर्याएका छन । यसअघि अल्पमतमा रहेका ओलीले बामदेवलाई फकाएर आफ्नो गुटमा ल्याएसँगै सचिवालयमा बहुमत पुर्याएका हुन ।
अब ओलीसँग महासचिव विष्णु पौडेल, उपाध्यक्ष बामदेव गौतम, उपप्रधान तथा रक्षामन्त्री इश्वर पोखरेल र गृहमन्त्री रामबहादुर थापा छन । प्रचण्डसँग भने माधव नेपाल, झलनाथ खनाल र नारायणकाजी श्रेष्ठ छन । बामदेवकै कारण यसअघि प्रचण्ड सचिवालयमा हावी थिए भने ओली कर्नरमा पर्दै आएका थिए ।
शनिबारको सचिवालय बेठकसँगै प्रधानमन्त्री ओलीले पाँच बर्ष पुरा शासन गर्ने लगभग पक्का पक्की भएको छ । यसअघि अर्का अध्यक्ष प्रचण्डसँग आलोपालो सरकार चलाउने सहमतिलाई समेत पन्छाएर अघि बढेका ओली अहिले प्रचण्ड, माधव नेपाल र बाामदेवकै रणनीतिलाई चिरेर सरकार स्थायी बनाउन सफल देखिएका छन ।
आत्मालोचना गरेपछि अब प्रचण्ड र माधवसँग प्रधानमन्त्रीको राजीनामा माग गर्ने नैतिक हैसियत छैन । अर्काको दल फुटाउन र उस्तै परे आफ्नै दल नेकपा फुटाउन पनि काम लाग्ने दल विभाजन सम्बन्धिको अध्यादेश ल्याएर पार्टी भित्र र बाहिर घेराबन्दीमा परेका ओलीले यो चुनौति दृढताका साथ पन्छाएका छन । जुन उनका लागि थप उत्साहको विषय हो ।
प्रचण्ड, माधव नेपाल र झलनाथ मिलेपछि लगभग दुबै पदबाट हात धुने अवस्थामा पुगेका ओलीले यसलाई शानदार ढंगले व्यवस्थापन गरेर फेरि राजनेताको छवि फर्काउन सफल देखिएका छन ।
बाँकी समयमा थोरै बोली र कार्यशैली फेर्न सकेको खण्डमा प्रधानमन्त्री ओली आगामी महाधिवेशनबाट अध्यक्ष बन्ने सम्भावना पनि उत्तिकै छ । आगामी महाधिवेशनमा अर्का अध्यक्ष प्रचण्ड र बरिष्ठ नेता माधव नेपाल उठ्न चाहेपनि त्यतिबेलासम्म ओलीले असन्तुष्ट सबैलाई साथमा लिएर विश्वास थप्न सक्ने अपेच्छा छ ।
झण्डै झण्डै गुमाइसकेका पद फिर्ता पाएका ओलीले अब पार्टीभित्र र बाहिर जुनसुकै परिस्थितीको सामना गर्ने सामर्थ्य बटुलेका छन । यसले ओलीको राजनीतिक कद मात्रै होइन उनको कुटनीतिक क्षमता पनि दोब्बरले बढेको देखिन्छ ।
Discussion about this post