बाँके बैशाख २२ गते । कोरोना संक्रमणको जोखिम बढेपछि जिल्ला प्रशासन कार्यालय बाँकेले भोलिदेखि नेपालगन्जमा निषेधाज्ञा जारी गरेको छ । भोली विहान ११ बजेदेखि लागु हुने गरी तीन दिनसम्मका लागि निषेधाज्ञा जारी गरिएको बाँकेका प्रमुख जिल्ला अधिकारी कुमार बहादुर खड्काले जानकारी दिनुभयो ।
आज बसेको जिल्ला सुरक्षा समितिको आकास्मिक बैठकले नेपालगन्जलाई निषेधित क्षेत्र घोषणा गर्दै आगामी २५ गते राती १२ बजेसम्म लागु हुने गरी निषेधाज्ञा जारी गरेको हो । निषेधाज्ञाको समयमा सुरक्षाकर्मी, स्वास्थ्यकर्मी र स्वाव संकलनमा खटिने कर्मचारी बाहेक अरु सवैलाई हिडडुलमा प्रतिबन्ध लगाइएको छ ।
नेपालगन्ज उपमहानगरपालिका ८ जोलहनपुरुवामा ८ परिवारका १६ जनामा कोरोना पुष्टि भएपछि प्रशासनले मानिसहरुको मुभमेन्ट रोक्न निषेधाज्ञा जारी गरेको जनाएको छ । कोरोनाको त्रासका कारण नेपालगन्जका अधिकांश टोलहरु स्थानीय आफैले पनि सील गरेका छन् ।
बैठकले सब्जीमण्डीलाई अर्को निर्णय नभए सम्मका लागि बन्द गर्ने निर्णय समेत गरेको छ ।
आज बसेको बैठकले सुरक्षाकर्मी, स्वास्थ्यकर्मी, स्वाव संकलन गर्ने र कन्ट्याक्ट ट्ेसिङ्गका जनशक्ति बाहेक कोहीपनि आवागमनमा रोक लगाउने निर्णय गरिएको छ ।
आफ्नो क्षेत्र सुरक्षित गर्ने बहानामा कुनैपनि किसिमले बाटो छेक्ने, राजमार्ग रोक्ने कार्य कोही कसैबाट गर्न नपाइने र त्यस प्रकारको कार्य गरेमा कानुन अनुसार कारवाही समेत गर्ने निर्णय गरेको छ ।
सामाजिक तथा धार्मिक सद्भावमा आँच आउने, खलल पर्ने सामाग्री प्रकाशन, प्रसारण र पोष्ट गर्ने व्यक्तिको पहिचान गरी तत्काल कानुनी दायरामा ल्याउने निर्णय समेत बैठकले गरेको छ ।
Discussion about this post