सुर्खेत बैशाख २२ गते । कर्णाली प्रदेशले सबै सीमानाका ‘सिल’ गरेको छ । आइतबार एकैदिन नेपालगञ्जमा कोरोना भाइरसका १५ जना संक्रमित फेला परेको भोलिपल्टै कर्णाली प्रदेशसले सबै सीमानाका एक हप्ताका लागि पूर्ण रुपमा बन्द गर्ने निर्णय गरेको हो ।
सोमबार कर्णाली प्रदेशका मुख्यमन्त्री महेन्द्रबहादुर शाहीको अध्यक्षतामा बसेको कर्णाली प्रदेश विपद् व्यवस्थापन परिषद्को वैठकले सोमबार रातीदेखि कर्णाली प्रदेशका सबै नाका बन्द गर्ने निर्णय गरेको मुख्यमन्त्रीका प्रेस सल्लाहकार ध्रुब बुढाथोकीले जानकारी दिए ।
साथै कर्णाली प्रदेश सरकारले थप २५ ठाउँमा कोरोना परीक्षणलाई तिब्रता दिने निर्णय पनि गरेको छ । नेपालगञ्जबाट भित्रिएकाहरुमा कोरोना संक्रमण फैलिएको आशंकामा चिकित्सकसहित थप २५ ठाउँमा परीक्षणको दायरा बढाउने निर्णय गरिएको हो ।
सीमानाका सिल भएसँगै कर्णाली भित्रिने मालवाहक गाडी तथा अत्यावश्यक सामान बोक्ने साधन पनि बन्द गरिएको छ । आइतबार नेपालगञ्जमा १५ जना र विगरगञ्जमा एक जना गरी १६ जनामा संक्रमण देखिएको थियो । नेपालमा अहिलेसम्म ७५ जनामा संक्रमण पुष्टि हुँदा कर्णाली प्रदेशमा भने कोरोना देखिएको छैन ।
Discussion about this post