बुटवल जेठ २ गते ।
प्रदेश नं ५ सरकारले कोरोना भाइरस बाट प्रभावित किसानलाई राहत प्रदान गर्न कोरोना विशेष कृषि कार्यक्रम सञ्चालन गर्ने भएको छ । मन्त्रिपरिषद्को आज बसेको बैठकले कार्यक्रमका लागि रु ५१ करोड १४ लाख आगामी साउन मसान्तसम्म खर्च गर्ने निर्णय गरेको मुख्यमन्त्रीका प्रेस सल्लाहकार शेरबहादुर केसीले जानकारी दिएका छन् ।
सरकारले कृषि एम्बुृलेन्स परिचालनका लागि रु ३४ लाख छुट्टयाउने निर्णय गरेको छ । गुल्मी,प्युठान, रुकुम र रोल्पामा बेमौसमी आलु उत्पादन कार्यक्रम सञ्चालनका लागि रु एक करोड २० लाख बजेट छुट्टयाइएको छ । कार्यक्रमबाट जिल्लाका पाँच सय किसान लाभान्वित हुने सरकारको विश्वास छ ।
यस्तै सरकारले व्यावसायिक तरकारी उत्पादन गर्न चाहने किसानलाई प्रोत्साहन गर्न दाङ, पाल्पा, अर्घाखाँची, गुल्मी, प्युठान, रोल्पा र रुकुम जिल्लामा अनुदान कार्यक्रम सञ्चालन गर्ने निर्णय गरेको छ । सो कार्यक्रमबाट सात हजार किसान लाभान्वित हुने अनुमान छ ।
कम्तीमा दुईदेखि छ रोपनीमा खेती गरेका किसानलाई सो कार्यक्रममा समावेश गराइने छ । मल र बीउका लागि प्रतिरोपनी रु पाँच हजारका दरले अनुदानसमेत दिइने सो कार्यक्रमका लागि रु १४ करोड खर्च गर्ने निर्णय भएको सल्लाहकार केसीले जानकारी दिएका छन् ।
यस्तै सरकारले कोरोना भाइरसका कारण विदेशबाट फर्केका र व्यावसायिक खेती उन्मुखका लागि प्रोत्साहन गर्न रु २१ करोड ८० लाख खर्च गर्ने निर्णय गरेको छ । एक सय नौ वटै पालिकामा सञ्चालन हुने सो कार्यक्रमअन्तर्गत व्यावसायिक खेतीका लागि मल विषादी, ससाना औजार, प्लाष्टिक घर, च्याउघर र खोर निर्माण गर्न प्रतिकिसान रु २० हजारका दरले सहयोग गरिने छ ।
यसबाट १० हजार नौ सय लाभान्वित हुनेछन् ।
ब्रोइलर कुखुरापालन साना किसान लक्षित कार्यक्रमका लागि रु सात करोड छुट्टयाउने निर्णय भएको छ । यो कार्यक्रमअन्तर्गत दुई हजार किसानलाई रु ३५ हजार दरले अनुदान दिइने र ६ हजार लाभान्वित हुने अनुमान गरिएको छ ।
दूध उत्पादक किसान विशेष राहत कार्यक्रमका लागि रु दुई करोड ८० लाख छुट्टयाएको छ । दूध उत्पादनको आठ महिनाको बिक्री तथ्याङ्क हेरी लकडाउनको ४० दिनको प्रतिलिटर रु १० का दरले अनुदान दिइने छ ।
प्रदेशका सबै जिल्लामा बीउ उत्पादन कृषक लक्षित कार्यक्रमका लागि रु चार करोड खर्च गर्ने निर्णय भएको छ । बीस हजार बिघामा खाद्यान्न र तरकारीको बीउ उत्पादन गर्ने र प्रतिबिघा रु २० हजारका दरले अनुदान दिने निर्णय भएको प्रेस सल्लाहकार केसीले जानकारी दिएका छन् । यी सबै कार्यक्रमबाट ४१ हजार चार सय प्रत्यक्ष लाभान्वित हुने अनुमान गरिएको छ ।
Discussion about this post