खोजखबर संवाददाता
बाँके भदौ १ गते । चौधरी ग्रुपको सहयोगमा यहाँ सञ्चालन गरिएको क्वीक्स कप अन्तर विद्यालय छात्रछात्रा फुटबल प्रतियोगिता आइतवार सम्पन्न भएको छ । नेपालगन्जस्थित रंगशालामा आइतवार खेलिएको प्रतियोगिताको उपाधि भिडन्तमा दीपज्योती मावि, चिसापानी र जनज्योती पब्लिक हाइस्कूल कोहलपुर विजयी भएर पहिलो हुन सफल भएका छन् ।
छात्राको फाइनल खेलमा जनज्योतीले अमर मावि, गौतमबस्तीलाई ६–० गोलले पराजित गरेर उपाधी हात पार्यो । जनज्योतीको उपाधि जीतमा अञ्जली चौधरी र रोजी सुवेदीले ह्याट्रिक गरेर टीमलाई जीत दिलाएका थिए । क्वीक्स कप छात्रा फुटबलमा आठ वटा टीमले भाग लिएका थिए ।
सोही प्रकारले छात्रतर्फको फाइनल खेलमा दीपज्योती मावि चिसापानीले ‘दीपज्योती विद्याश्रमलाई ५–३ गोलले पराजित गर्दै उपाधी जितेको छ । शुरुवाती दुई गोलको अग्रतालाई जोगाउन नसक्दा दीपज्योती विद्याश्रम, चप्परगौडी उपविजेतामा सीमित हुन पुग्यो । दीपज्योती मावि, चिसापानीको तर्फबाट लक्ष्मण रानाले दुई, सुमित थापामगर, राजु चौधरी र सन्दीप सोनीले एकएक गोल गरेका थिए । दीपज्योती विद्याश्रमबाट ईश्वर श्रेष्ठले दुई र गणेश कुँवरले एक गोल गरे ।
प्रतियोगिताका विजेता, उपविजेता खेलाडी तथा प्रशिक्षकलाई नेपालगञ्जका मेयर डा। धवलशमशेर राणा, उपमेयर उमा थापामगर, राखेपका सदस्य विनोद मैनाली, एन्फाका पूर्व मानार्थ उपाध्यक्ष गोवद्र्धनसिंह सम्झना, मध्यपश्चिम क्षेत्रीय खेलकुद विकास समितिका कार्यवाहक अध्यक्ष नरेन्द्र थापा, बाँके जिल्ला फुटबल संघका अध्यक्ष भोजराज शाहीलगायतले पुरस्कार, प्रमाणपत्र र शिल्ड वितरण गरेका थिए ।
बाँके जिल्ला फुटबल संघले आयोजना गरेको क्वीक्स कपमा छात्रतर्फ ३२ र छात्रातर्फ आठ वटा स्कूलले भाग लिएका थिए । क्वीक्स कपका शुरुवाती खेलहरु पुष्पलालचोकस्थित दंगा नियन्त्रण गण ब्यामशालामा भएको थियो । आठौं राष्ट्रिय खेलकुदपछि पहिलो पटक नेपालगञ्ज रंगशालालाई खुल्ला गरिँदा क्वीक्स कप सञ्चालन गरिएको थियो । स्कूले विद्यार्थीले जिल्लामा पहिलो पटक अन्तर्राष्ट्रिय स्तरको रंगशालामा खेल्ने मौका पाएका हुन् ।
Discussion about this post