काठमाडौ जेठ ३१ गते ।
आज संसदबाट नक्सा सम्बन्धी नेपालको संविधानको दोस्रो संशोधन विधेयक पारित हुने भएको छ । सरकारले सन् १८१६ को सुगौली सन्धिअनुसार लिम्पियाधुरासहितको राजनीतिक तथा प्रशासनिक नक्सा सार्वजनिक गरेलगत्तै निशान छाप परिवर्तनका लागि संसदमा दर्ता गरेको संविधान संशोधन विधेयक आज शनिबार पारित हुने भएको हो ।
यो विधेयक पारित भएसँगै नेपालको संसदबाट अर्को ऐतिहासिक निणर्य हुनेछ । सम्भवत आज नेपाल र नेपालीको लागि अर्को ऐतिहासिक दिन रहनेछ । ऐतिहासिक निणर्यसँगै अब मुलुकको संविधान तथा निशान छापमा समेत लिम्पियाधुरा, लिपुलेक र कालापानी समेटिएको नक्सा समावेश हुनेछ ।
संघीय संसदबाट लिम्पियाधुरा सहितको नयाँ निशानछाप बनाउन गरिएको संविधान संसोधन प्रस्ताव आज पारित हुने संसद सचिवालयले जनाएको छ ।
संसोधनको प्रस्ताव गरेपछि यो प्रस्ताव परिपक्व हुनका लागि आवश्यक पर्ने ७२ घण्टाको समयावधि हिजो पूरा भएपछि आज छलफल गरी पारित गर्ने तयारी भएको हो ।
आज शनिबार दिउँसो १ बजे बस्ने बैठकमा कानुन, न्याय तथा संसदीय मामिला मन्त्री डा. शिवमाया तुम्बाहाङ्फेले नेपालको संविधान दोस्रो संशोधन विधेयक २०७७ माथि दफावार छलफल गरियोस् भनी प्रस्ताव प्रस्तुत गर्नेछिन् ।
प्रतिनिधिसभाको आजको बैठकमा संविधान संसोधन विधेयकमाथि दफावार छलफल गरियोस् भन्ने प्रस्ताव प्रस्तुत गर्ने र दफाबार छलफल पछि पारित गरिनेछ ।
समाजवादी पार्टी, नेपालले संविधानको अनुसूची-३ संशोधन गर्न संसदमा प्रस्तुत विधेयकको पक्षमा मतदान गर्ने निणर्य हिजो गरेको छ ।
नयाँ नक्साअनुसारको निशान छापसम्बन्धी संविधान संशोधन विधेयकमा सबै राजनीतिक दलले समर्थन जनाएका छन् ।
Discussion about this post