काठमाडौ जेठ ३२ गते ।
स्वास्थ्य तथा जनसङ्ख्या राज्यमन्त्री नवराज रावतले अब दैनिक २० हजारको सङ्ख्यामा कोरोना भाइरसको परीक्षण हुने बताएका छन् । नेपालमा हाल चारदेखि पाँच हजारको सङ्ख्यामा पीसीआर विधिबाट कोरोना परीक्षण भइरहेको छ भन्दै उनले सरकारले यसलाई बढाएर दैनिक २० देखि २२ हजारको सङ्ख्यामा परीक्षण गर्ने तयारी गरिरहेको बताएका छन् ।
स्वास्थ्य राज्यमन्त्री रावतले भारतको सीमामा बसिरहेका नागरिकलाई मापदण्ड अनुसारको क्वारेन्टाइन नहुँदा कतिपय भारतबाट आएका नागरिक सङ्क्रमित भएको बताए । सुरुमा सुदूरपश्चिममा केही सङ्क्रमित देखा परिसकेपछि स्वास्थ्य मन्त्रालयले ३५ जना डाक्टर त्यहाँ पठाएको अवगत गराउँदै कोरोना नियन्त्रण गर्न सरकारका तर्फबाट गर्ने सबै काम गरिरहेको जानकारी दिए।
राज्यमन्त्री रावतले नेपालमा कोरोना सङ्क्रमित बढ्नुमा विदेश तथा भारतबाट आएका नागरिक मुख्य कारण हुन् भन्नुभयो । सरकारले कर्णाली प्रदेशलाई कोरोना सङ्क्रमितबाट बचाउन ग्रिनजोनमा राख्न खोजिएको प्रयास पनि असफल भएको उल्लेख गरे। भारतमा भएका दाजुभाइ गाउँ आउँदा सङ्क्रमित भएर आएको भन्दै उनले गाडीमा पनि हुलमुल भएर सङ्क्रमित हुनुपरेको जानकारी दिए ।
राज्यमन्त्री रावतले कोरोना नियन्त्रण सम्भव भएको र समग्रमा अति उच्च जोखिम देखिएका प्रदेश १, प्रदेश २, प्रदेश ५, कर्णाली प्रदेश जोखिममा देखिएको हुनाले यसको व्यवस्थापकीय पक्षमा ध्यान दिनुपर्ने धारणा व्यक्त गरे । त्यसका लागि विश्व स्वास्थ्य सङ्गठनले बनाएको नियम पालना गर्नुको विकल्प नभएको उनको बुझाइ छ । मास्क लगाउने, सेनिटाइजर लगाउने, दूरी कायम गर्ने गर्नुपर्दछ । कोरोना नेपालमा मात्र होइन विश्वव्यापी समस्या बनेर आएको छ । यसको खोपको अनुसन्धान विश्वव्यापी रूपमा भइरहेको छ । उनले सरकारले हालै ल्याएको जनस्वास्थ्य सम्बन्धी मापदण्ड प्रत्येक नागरिकले पालना गर्नसके कोरोनाबाट बच्न सकिने बताए । हालसम्म कोरोनाको भ्याक्सिन तथा औषधि पत्ता लगाउन नसकिएको बताएका छन् । उनले भारतबाट आउनेको सङ्ख्या कम नभएसम्म कोरोना नियन्त्रण गर्न सकिँदैन भने । सुरु सुरुमा दैनिक २५ हजारसम्म नेपाल भित्रिएका थिए भने पछिल्ला दिनमा त्यो सङ्ख्या घटेर पाँच,छ हजारमा झरिसकेको बताए।
रावतलले अहिले नेपाल प्रवेश गर्ने नाका पनि कम गरिएको छ । अब नेपाल आइरहेका नेपाली नागरिकको पीसीआर परीक्षणमा प्राथमिकता दिनुपर्दछ । सङ्क्रमितलाई आइसोलेसनमा राख्ने र सङ्क्रमण नदेखिएकालाई घर पठाउनु पर्ने बताए।
उनले भारतबाट आएका नागरिकलाई परीक्षण गर्नैपर्छ । मन्त्रालयले ११ वटा अटोमेसिन किन्ने र देशका प्रमुख सहरबाट ठूलो सङ्ख्यामा पीसीआर परीक्षण गर्ने तयारी गरिरहेको जानकारी दिए। खुला सिमाना भएका कारण भारतमा सङ्क्रमितको सङ्ख्या नघट्दासम्म नेपालमा कोरोना घट्न गाह्रो हुने उनको भनाइ छ । भारतमा करोडौँ जनता सडकमै जन्मन्छन्, सडकमै सुत्छन्, सडकमै खान्छन् । अहिले त्यो जनसङ्ख्या सङ्क्रमणको उच्च जोखिममा रहेको भन्दै उनले विशेषतः भारतको महाराष्ट्रबाट जति नेपाल भित्रिए, उनिहरू अधिकांश सङ्क्रमित रहेको बताए ।
उनले कोरोन रोग नियन्त्रण गर्न पीसीआर बढाउनैपर्छ । निजी क्षेत्रका अस्पताललाई पनि कोरोनाको उपचारमा लगाउनुपर्छ भन्दै उनले सबै मिलेर कोरोनाविरुद्ध जुट्नुपर्ने बेला आएको बताए।
क्वारेन्टाइन गाउँगाउँमा अव्यवस्थित हुनसक्ने भन्दै केन्द्र र नेपाली सेनाले बनाएका क्वारेन्टाइन धेरै राम्रा रहेको ती क्वारेन्टाइन विश्व स्वास्थ्य सङ्गठनको मापदण्डमा बनाइएको उनले दाबि गरे ।
Discussion about this post