खोजखबर संवाददाता
काठमाडौ भदौ १३ गते ।
शहरी विकास मन्त्री मोहम्मद इस्तियाक राईले नेपालगञ्ज काञ्जी हाउसमा रहेका गाई सुर्खेतको जंगलमा मृत भेटिएको घटनाले आफु स्तब्ध भएको बताउनुभएको छ । नेपालगञ्जको काञ्जी हाउसबाट दैलेखका लागि लैजादै गरिएका केही गाई सुर्खेतको कटकुवास्थित जंगलमा भीरबाट खसालेर मारिएको समाचार सार्वजनिक भएपछि मन्त्री राईले बिज्ञप्ती जारी गरि उक्त घटनाप्रति गहिरो दुःख व्यक्त गर्नुभएको हो ।
यसैबीच मन्त्री राईले गाई मारिएको घटनावारे यथार्थ छानविन गरी दोषी उपर कडा कारवाही गर्न आजै गृह मन्त्रालयलाई पत्राचार गर्नुभएको छ । उहाँले गृहमन्त्री रामबहादुर थापालाई पत्र लेखी सामुहिक रुपमा गौहत्या गरिएको भनि स्थानिय जनताबाट आएको अभिव्यक्ति र आक्रोश आएको भन्दै अविलम्ब सम्बन्धित निकाय र जिम्मेवार पक्षमाथी छानविन र कारवाही गर्न ध्यानाकर्षण गराउनुभएको छ ।
राष्ट्रिय जनावरको उचित व्यवस्थापन र संरक्षण हुनुपर्नेमा सामुहिक रुपमा गाईलाई भीरबाट खसालेर मार्ने कार्य अन्यन्तै घृणित र अमानवीय भएका भन्दै मन्त्री राईले उक्त कार्यमा संलग्नलाई कडा कारवाही गर्ने जनाउ दिनुभएको छ ।
राष्ट्रिय जनावरको रुपमा रहेका गाईको उचित व्यवस्थापन र संरक्षण गर्न लागि सांसद विकास कोषबाट एक करोड रुपैया सहयोग गर्ने घोषणा गरेको स्मरण गर्दै मन्त्री राईले भन्नुभयो, गाईको संरक्षणमा सरकार गम्भीर छ ।
छाडा चौपायाको व्यवस्थापन गर्ने जिम्मा स्थानिय सरकारको भएकाले नेपालजञ्ज उपमहानगरपालिकाले गाईको उचित व्यवस्थापन र संरक्षणमा ध्यान दिनुपर्नेमा ठुलो संख्यामा गाईलाई भीरबाट खसालेर मार्नुले गम्भीर आशंका पैदा गरेको मन्त्री राईले उल्लेख गर्नुभयो ।
Discussion about this post