जावेद अन्सारी
बाँके असोज २५ गते
बाँकेका प्रहरी उपरीक्षक एसपी ओमबहादुर रानाले आफ्ना सत्र बुँदे प्रतिबद्धता कार्यान्वयनलाई प्रभावकारी बनाइएको बताउनुभएको छ । आफुले बाँके प्रहरी प्रमुखको जिम्मेवारी सम्हालेपछि १७ बुँद्धे प्रतिबद्धतापत्र सार्वजनिक गरेको स्मरण गर्दै एसपी रानाले त्यसको कार्यान्वयनलाई तीब्र पारिएको बताउनुभयो ।
बाँके प्रहरी प्रमुखको जिम्मेवारी सम्हालेको आज ३ महिना १९ दिन पुगेको जानकारी दिँदै अन्लाईन खोजखवरसँगको विशेष कुराकानीमा उहाँले गुण्डागर्दी, प्राकृतिक स्रोतसाधनमाथिको दोहन, नाकाबाट हुने अवैध चोरी पैठारीविरुद्ध आक्रामकरुपमा कारवाही गरिएको बताउनुभयो । उहाँले यसमा प्रहरीले सफलता हासिल गरेको दावी समेत गर्नुभयो ।
त्यस्तै उहाँले अदालतबाट कैदभुक्तान फैसला भएर फरार भएका अपराधिहरुलाई समेत धमाधम पक्राउ गर्न सफल भएको पनि बताउनुभएको छ । आफु आएपछि फैसला काट्न बाँकी रहेका ३ सय ६७ जनालाई पक्राउ गरी कारागार चलान गरिएको जानकारी दिनुभयो । कर्तव्य ज्यान, बम विस्फोट, हत्या लगायतका घटनामा दोषी ठहर भइ फरार रहेका उनीहरु प्रहरीको फन्दामा परेका हुन् ।
यस्तै वन्यजन्तु ओसारपसार, लागुऔषध कारोवारीलगायतका अपराधकर्ममा लाग्नेहरु पनि प्रहरीको फन्दामा परेका छन् । यो अवधिमा करिव डेढ करोड राजश्व उठाउन प्रहरी सफल भएको पनि बताउनुभयो । बाँकेमा लागु औषध ठूलो चुनौतिको रुपमा रहेको आफुले पाएको बताउनुभयो ।
कारोवारी र प्रयोगकर्ता दुवैलाई कारवाहीको दायरा र जनचेतना फैलाउन ८१ वटा वडास्तरीय लागु औषधविरुद्ध महाअभियान सुरु गरिएको बताउनुभयो । स्थानीय सरकार, स्थानीयबासी, प्रहरी सबैसँगको सहकार्यमा लागु औषध नियन्त्रण गरिने उहाँको भनाइ छ ।
नेपाल भारत खुला सीमानाका कारण सीमामा हुने अपराध न्यूनिकरणमा चुनौति भएपनि प्रहरी सजग रहेको बताउनुभयो । उहाँले स्थानीय तहसँग समन्वय गरेर नाकाबाट हुने चोरी तस्करी नियन्त्रणमा प्रहरी लागिपरेको बताउनुभयो । चाडपर्वलाई लक्षित गरेर प्रहरीले विशेष सुरक्षा योजना कार्यान्वयन गरिसकेको उहाँले जानकारी दिनुभयो ।
दशैं, तिहार र छठ पर्वलाई लक्षित गरी प्रहरीले विशेष सुरक्षा योजना ल्याएको हो । प्रहरीले त्यसका लागि १२ प्रकारको टीम तयार पारेको छ । छुटछुटै टोली बनाएर खटाइएकाले चाडपर्वमा हुने सुरक्षा चुनौति कम हुने उहाँको विश्वास छ । हाइवये चेकजाँच, मोवाइल गस्ति, साधारण पोशाकमा प्रहरी, शंकास्पद ठाउँमा निगरानीलगायतका टीम परिचालन गरिएको एसपी रानाले बताउनुभयो । विशेष सुरक्षा योजनाका लागि ६ सय ५० जना सुरक्षाकर्मी परिचालन गरिएको छ ।
भन्सार चोरी निकासी पैठारी तथा सवारी साधन पक्राउबाट ९६ हजार बढी राजश्व उठेको एसपी रानाले बताउनुभयो । बोलेरो भ्यान, मोटरसाइकल, अटो रिक्सा, साइकल, मोवाइल, केराउ, कपडा, पानको पात, मेघाश्री, छालाको जुत्ता, युरिया मलबाट ९६ लाख २७ हजार ३ सय २३ रुपैयाँ राजश्व उठेको छ ।
त्यस्तै तस्करी नियन्त्रण, ट्राफिक कारवाही तथा जरिवाना, जुवाबाट, मास्क प्रयोग नगर्नेबाट, प्राकृतिक स्रोतको दोहन गर्नेलाई कारवाही गर्दा १ करोड ४९ लाख ९ हजार २ सय ६९ रुपैयाँ राजश्व संकलन भएको एसपी रानाले बताउनुभयो ।
एसपी रानाले कर्तव्य ज्यान, बम विस्फोट, अपहरण, फिरौतीमा संलग्न फरार मोष्ट वाण्डेट एकजनालाई पक्राउ गर्नुलाई ठूलो सफलता भन्नुभएको छ । ४३ करोड २ लाख ५३ हजार ठगी मुद्दामा फरार मुख्य प्रतिवादीलाई समेत पक्राउ गरिएको जानकारी दिनुभयो ।
उहाँका अनुसार, पछिल्लो चार महिनामा ३ सय ६७ जना फरार अपराधीहरु पक्राउ परेका छन् । असारमा ८, साउनमा ५६, भदौमा २४१, असोज ९हालसम्म० ६२ जना पक्राउ परेका छन् । उनीहरुबाट ११ लाख ७१ हजार ६ सय ९२ रुपैयाँ जरिवाना असुल गरिएको छ भने ९८ बर्ष २ महिना २० दिन कैद सजाय असुल गरिने छ ।
यस्तै प्राकृतिक स्रोतसाधनमाथि दोहन गर्नेलाई पनि कारवाही गरिएको छ । डुडुवा खोला, मुगुवा खोला, खैरी खोला र राप्तीनदीबाट अवैध उत्खनन् गर्नेलाई कारवाही गर्दा २ लाख ७५ हजार राजश्व उठेको छ । करिव ५ करोड बराबरको अवैध गिट्टी बालुवा, ढुंगा सिज गरिएको छ । २४ वटा क्रसर उद्योग बन्द गरिएको छ ।
त्यस्तै ३९ ट्याक्टर, ३ वटा जेसिभी र २ वटा टिप्पर बरामद गरिएको एसपी रानाले बताउनुभयो । प्रहरीले जुवातास विरुद्ध पनि आक्रामकरुपमा प्रस्तुत भएको छ । ३ जना जुवाडेलाई मुद्धा चलाइएको छ भने १६ जनालाई पक्राउपछि कारवाही गरिएको छ । उनीहरुबाट ३ लाख ८१ हजार ९ सय ५० रुपैयाँ बरामद गरिएको छ ।
भिडियो हेरौं
Discussion about this post