खोजखबर संवाददाता
बाँके भदौे २० गते । १३ औं मानव बेचविखन विरुद्धको राष्टिय दिवस आज शुक्रवार बाँकेमा पनि विविध कार्यक्रमको आयोजना गरेर मनाईंदैछ । सो अवसरमा बेचविखन विरुद्ध काम गर्दै आएका विभिन्न संघसंस्थाले कार्यक्रमहरु गरेर चेतना अभिबृद्धि गरिरहेका छन् ।
सोही अवसरमा कोहलपुरमा आज विहान विभिन्न क्षेत्रका अगुवाहरुको सहभागितामा प्रभातफेरी कार्यक्रमको आयोजना गरियो । सरकारको प्रतिवद्धता मानव बेचविखन तथा ओसारपसार नियन्त्रणमा हामी सबैको एकेबद्धता भन्ने मूल नाराका साथ सो प्रभात फेरी आयोजना गरिएको थियो ।
कोहलपुर नगरपालिकाको आयोजनामा निकालिएको प्रभातफेरी कार्यक्रम अन्तर्गत रयालीले नगरका विभिन्न भागमा परिक्रमा गरेर सभामा परिणत भएको थियो । सभामा बोल्दै कोहलपुर नगरपालिकाका प्रमुख लुट बहादुर रावतले मानव बेचविखन भयावह रुपमा बढ्दै गएकोले सो नियन्त्रणका लागि विद्यालयस्तरबाटै सचेतनामूलक कार्यक्रम र अभियान संचालन गर्नु पर्नेमा जोड दिए ।
उनले नेपालगन्ज नाका मानव बेचविखनका लागि निकै प्रयोग भैरहेकोले सो नाकामा पनि कडाई गरिनु पर्ने र चेतनामूलक कार्यक्रममा बढी ध्यान दिनु पर्ने बताउनु भयो ।
सो अवसरमा कोहलपुर नगरपालिकाका सामाजिक विकास संयोजक नारायणी ओलीले मानव बेचविखन नियन्त्रणका लागि सबैले मिलेर सामुहिक रुपमा काम गर्नु पर्ने आवश्यकता औंल्याइन् ।
मानव बेचविखन विरुद्धको राष्टिय दिवसकै अवसर पारेर शनिवार मानव बेचविखन विरुद्ध कोहलपुरमा एक बृहत्त प्रशिक्षण कार्यक्रमको ओयाजना गर्ने नगरपालिकाले जनाएको छ ।
सोही प्रकारले शुक्रवार विहानै नेपालगन्जमा पनि दंगा प्रहरी गणमा रहेको महिला सेलमा मानव बेचविखन बिरुद्ध एक कार्यक्रmमको आयोजना गरिएको थियो । सो कार्यक्रममा पनि जिल्लाका विभिन्न क्षेत्रका अगुवाहरुले महिला बेचविखन बढ्दै गएकोमा चिन्ता व्यक्त गर्दै नियन्त्रणका लागि सामुहिक प्रयासमा जोड दिएका थिए ।
Discussion about this post