खोजखबर संवाददाता
बाँके भदौ २० गते । प्रदेश नम्बर ५ मा डेंगुबाट ५६ जना संक्रमित भएका छन् । देशभरमा १ हजार ५ सय ३७ जना डेंगुबाट संक्रमित भएकोमा प्रदेश ५ मा ५६ जना रहेका छन् । ३ महिनाअघि धरानमा देखापरेको डेंगु नियन्त्रणमा नआएपछि यसको प्रकोप बढ्दै गएको हो । देशभर डेंगुको प्रकोप फैलिएसगैं बाँके पनि अछुत रहन सकेको छैन । बाँके जिल्लामा पनि यो रोगको प्रकोप देखिएको छ ।
इपिडिमियोलोजी तथा रोग नियन्त्रण महाशाखा, टेकुका अनुसार बाँकेमा दुई जना डेंगुका बिरामी देखिएका छन् । पछिल्लो समय डेंगुको प्रकोप बढ्दै गएपछि चिन्ता र चासो बढेको छ । डेंगु नियन्त्रण सफल नहुँदा देशको कर्णाली प्रदेश बाहेकका सबै प्रदेशमा यो रोग फैलिइसकेको छ । इपिडिमियोलोजी तथा रोग नियन्त्रण महाशाखा, टेकुका अनुसार डेंगु संक्रमण देखिएका ६ वटा प्रदेशमध्ये प्रदेश नम्बर १ सबैभन्दा बढी संक्रमित छ ।
प्रदेश ५ र सुदूरपश्चिममा भने डेंगुको संक्रमण अन्यको तुलनामा कम देखिएको छ । प्रदेश ५ मा ५६ र सुदूरपश्चिममा ६ जना डेंगुका बिरामी पाइएको इपिडिमियोलोजी तथा रोग नियन्त्रण महाशाखाले जनाएको छ । ३ महिनाअघि धरानमा देखापरेको डेंगुको संक्रमणबाट हालसम्म कम्तिमा ३ जनाको ज्यान गइसकेको छ । डेंगुको संक्रमण फैलिएसँगै बाँकेमा उच्च सर्तकता अपनाइएको जिल्ला जनस्वास्थ्य कार्यालय बाँकेले जनाएको छ । नेपालगञ्जस्थित भेरी अस्पतालमा डेंगुको उपचार हुने गर्दछ ।
Discussion about this post