खोजखबर संवाददाता
बाँके भदौ २२ गते । नेपालगन्जबाट भारत उत्तर प्रदेशको राजधानी लखनउका लागि सिधा बस सेवा आइतवारदेखि शुरु भएको छ । भेरी यातायात प्रालिले नेपाली नम्बरको बस लखनउसम्म र लखनउबाट नेपालगन्जसम्मका लागि संचालन गरेको हो ।
आइतवार विहान पुष्पलाल चोक नजिक आयोजना गरिएको एक औपचारिक कार्यक्रमविच नेपालगन्ज उपमहानगरपालिकाका प्रमुख डा. धवल शमसेर राणा र नेपालगन्ज उद्योग बाणिज्य संघका अध्यक्ष नन्दलाल वैश्यले सामुहिक रुपमा सो बस सेवाको शुभारम्भ गर्नुभयो ।
प्रमुख राणा र अध्यक्ष वैश्यले हरियो झण्डा देखाएर बसलाई नेपालगन्जबाट रवाना गर्नुभयो । सो अवसरमा उहाँहरुले पहिलो दिन लखनउको यात्रा गर्ने यात्रुहरुलाई अबिर र माला लगाएर विदाई गर्नु भयो ।
भेरी यातायात प्रालिका अध्यक्ष राजेन्द्र गिरिसहितको एक टोलीले केहही दिनअघि मात्र भारतको लखनउमा गएर उत्तर प्रदेश परिवहन निगमसँग नेपालगन्ज–लखनउ बस सेवा सञ्चालन गर्ने सम्झौता गरेर फर्किएको थियो ।
औषधी उपचार लगायत विभिन्न काम बिशेषले भारतको लखनउ जान चाहने नेपाली यात्रुहरुकोे सुविधाका लागि नेपालगन्जबाट सिधै लखनउ बस सेवा संचालन गर्ने सम्झौता गरिएको भेरी यातायात प्रालिका अध्यक्ष गिरिले बताउनु भयो ।
उहाँका अनुसार भारत उत्तर प्रदेश परिवरहन निगम रोडवेजसंग सो सम्झौता गरिएपछि नेपालगन्जदेखि लखनउसम्मको लागि आरामदायी बस सेवा यहाँबाटै सोझै संचालनमा आएको हो ।
नेपालगन्जको कारकाँदो चौकमा टिकट काउन्टर राखेर यहाँबाट लखनउको लागि विहान ८ बजे र लखनउको केशरबागबाट राती सवा ९ बजे बस छुट्ने छ ।
नेपालगन्ज तथा आसपासका जिल्लाहरुबाट औषधि उपचार तथा किनमेलका लागि लखनउ जानेहरुको सुविधालाई ध्यानमा राखेर भेरी यातायात प्रालिले नेपालगन्ज लखनउ सिधा बस सेवा सञ्चालन गरेको जनाएको छ ।
भेरी यातायात प्रालिले यस अघि नेपालगन्ज–दिल्ली नेपाल भारतमैत्री बस सेवा संचालन गर्दै आएको छ । नेपालगन्ज–लखनउ बस सेवा शुरु भएपछि नेपालीहरुलाई आरामदायी र सुरक्षित यात्राका साथै सीमानाको विभिन्न झन्झटबाट पनि मुक्ति मिल्ने आशा लिईएको भेरी यातायात प्रालिले जनाएको छ ।
Discussion about this post