फाइल फोटो
बाँके मंसिर १७ गते ।
सीमामा हुने ठूला अपराधका घटनालाई नियन्त्रणमा लिन आवश्यक परे हतियार चलाउन बाँके प्रशासनले माततहलाई निर्देशन दिएको छ । नेपाल भारत सीमावर्ती ग्रामीण क्षेत्रहरूको बाटो प्रयोग गरी तस्करी कार्य बढेपछि त्यसलाई नियन्त्रण गर्न आवश्यक परे गोली प्रहार गर्न जिल्ला प्रशासन कार्यालय बाँकेले मातहत निकायलाई निर्देशन दिएको हो ।
साना हातहतियार ओसारपसार, लागु औषध कारोवारजस्ता घटनालाई नियन्त्रणमा लिन प्रशासनले मातहतलाई बल प्रयोग गर्न भनेको छ । त्यस्तो बल प्रयोग गर्दा फायर समेत खोल्न निर्देशन भएको बाँकेका एसपी ओमबहादुर रानाले अनलाइन खोजखवरलाई बताउनुभयो ।
जिल्लाको सिमावर्ती क्षेत्रका केही प्रहरी चौकी र ईलाका प्रहरी कार्यालय मातहत पर्ने क्षेत्रहरू जैसपुर, पचपोखरा, जमुनहा, हिरमिनिया तथा कोहलपुरका पुराना तथा नयाँ तस्करहरु राष्ट्रसेवक कर्मचारीलाई प्रलोभनमा पारी सिमा क्षेत्रमा तस्करी कार्य भईरहेको सूचनाको आधारमा जिल्ला प्रशासन कार्यालय बाँके त्यसको नियन्त्रणका लागि आवश्यक परे फायर खोल्ने निष्कर्षमा पुगेको हो ।
सरकारी विशेष सुचनाको आधार तथा स्थानीय बासिन्दाहरूको समेत जनगुनासोको आधारमा जिल्ला प्रशासन कार्यालय बाँके र केही सुरक्षा निकायहरूको सदस्यहरू सहभागिता रहेको अनौपचारिक बैठकमा जिल्लाको समग्र शान्तिसुरक्षाको अवस्था,अवाञ्छित क्रियाकलाप तथा तस्करी नियन्त्रण विषयमा समेत छलफल भएको थियो।
जिल्ला प्रहरी कार्यालय बाँकेका प्रहरी प्रमुख उपरीक्षक ओम बहादुर राना मगरका अनुसार समाजमा भएका अवाञ्छित क्रियाकलाप तथा सिमा क्षेत्रमा तस्करी कार्य पूर्ण नियन्त्रण गर्न कार्ययोजनाका साथ थप कडाई गर्न प्रशासन बाट निर्देशन प्राप्त भएको जानकारी दिनुभयो। तर त्यसका लागि घटनाको प्रकृतिको अध्ययन र विश्लेषण गरिने पनि उहाँको भनाइ छ ।
Discussion about this post