जावेद अन्सारी
बाँके माघ ८ गते ।
नेपालगन्ज भन्सार कार्यालयले चालू आर्थिक वर्षको ६ महिनामा उत्साहजनक राजश्व संकलन गर्न सफल भएको छ । कार्यालयका प्रमुख जयबहादुर भण्डारीका अनुसार, प्रशासनिक सक्षमता, बाँकेका सरकारी कार्यालयसँगको समन्वयका कारण नेपालगन्ज भन्सार कार्यालयले ६ महिनामा लक्ष्य भन्दा २ अर्ब ३२ करोड रुपैयाँ बढी राजश्व असुली गरेको हो ।
कार्यालयको चालु आर्थिक वर्षको पुस मसान्तसम्मको लक्ष्य ७ अर्ब ५८ करोड रहेकोमा ९ अर्ब ९० करोड अर्थात १३० दसमलव ५५ प्रतिशत राजश्व असुली गरेको हो । चालु आर्थिक वर्षको पहिलो महिनामा १ सय ७७ प्रतिशत राजश्व असुली गरेको नेपालगन्ज भन्सारले यस वर्ष राजश्व असुली कम हुने पुस महिनामा समेत १ सय ३८ प्रतिशत राजश्व संकलन गरेको प्रमुख भण्डारीले बताउनुभयो ।
कार्यालयको यस वर्ष १५ अर्ब १८ करोड ९२ लाख ८५ हजार राजश्व असुली गर्ने लक्ष्य रहेकोमा सजिलै पूरा हुने संकेत देखिएको छ । उहाँले असोजदेखि नियमितरुपमा राजश्व बढ्दै गएको जानकारी दिनुभयो । उहाँले जाँचपासमा गरिएको कडाइका कारण राजश्व बढेको पनि बताउनुभयो । अवैध चोरी पैठारीमा गरिएको कडाइले राजश्व संकलनमा सकारात्मक प्रभाव पारेको पनि उहाँको भनाइ छ ।
खुला सीमानाका कारण राजश्व संकलनमा चुनौति थपिएपनि त्यसप्रति पनि भन्सार कार्यालय लागिपरेको बताउनुभयो । उहाँले लकडाउनको अवधिमा पनि भन्सारले नियमित काम गरेको बताउनुभयो । नेपाल आयातमा निर्भर देश भएकाले लकडाउनको अवधिमा पनि ठूलोमात्रामा खाद्यान्न आयात भएको बताउनुभयो ।
थन्किएका सवारीसाधन लिलामीको तयारी
अवैध चोरीपैठारीमा प्रयोगगरी नियन्त्रणमा रहेका सवारीसाधन तत्काल लिलाम प्रक्रियामा लैजाने तयारी भन्सार कार्यालयले गरेको छ । ती सवारीसधनका कारण कार्यालयनै डम्पिङ साइडजस्तै बनेको भन्दै उहाँले तत्काल अव लिलाम प्रक्रियामा लैजाने तयारी भइरहेको प्रमुख भण्डारीले बताउनुभयो ।
मुद्धा प्रक्रियामा गएका सवारीसाधन बाहेक कार्यालयमा लामो समयदेखि थन्किएका दुई पांग्रे र चार पांग्रे सवारीसाधनको लिलाम हुने छ । मंसिर ३ गते आफु कार्यालयमा हाजिर भएलगत्तै कार्यालय व्यवस्थापनमा समेत खटिएको जानकारी दिनुभयो ।
Discussion about this post