बाँके माघ १६ गते ।
प्रेस स्वतन्त्रता सेनानी बरिष्ठ पत्रकार पन्नालाल गुप्त चाचाजीको प्रथम पुण्यतिथीमा स्मृतिसभा गरिएको छ । प्रेस स्वतन्त्रता सेनानी पन्नालाल गुप्त प्रतिष्ठानले बिहीबार त्रिभुवनचोकस्थित महेन्द्र पुस्तकालयको सभाहलमा स्व गप्ताको फोटोमा माल्याअर्पणसहित स्मृति सभा गरेको हो ।
स्मृतिसभामा जनता समाजबादी पार्टीका केन्द्रीय अध्यक्ष उपेन्द्र यादवले लोकतन्त्र र मानव अधिकारका पक्षमा आजीवन कलम चलाउनुभएका स्वर्गीय गुप्त निष्ठावान् र निडर पत्रकार भएको बताउनुभयो । सधैं सत्यका पक्षमा कलम चलाएका गुप्तको व्यक्तित्व र योगदानबाट पत्रकार मात्र हैन, समाजको नयाँ पुस्ताले धेरै कुरा अनुशरण गर्न सक्ने बताउनु भयो ।
अध्यक्ष यादवले पीछडा वर्गको उत्थान, भाषा, साहीत्य र संस्कृतिमा पनि पत्रकार गुप्तको रुची र अग्रसरता रहेको स्मरण गर्नु भयो । पूूर्व मन्त्री मोहम्मद इस्तियाक राईले अहिलेका पत्रकारहरुले चाचाजीले देखाउनुुभएको बाटो पछ्याउन सके मात्रै पनि उहाँप्रति सच्चा श्रद्धाञ्जली हुने बताउनुभयो । नेपाली पत्रकारिता दुषित भइरहेको भन्दै उहाँले चाचाजीको लोकतन्त्र र पत्रकारिताप्रतिको विश्वास र लगाव अनुकरणीय रहेको बताउनुभयो ।
प्रतिष्ठानका अध्यक्ष एवं गुप्तका छोरा विजय कुमार गुप्ताले स्वर्गीय गुप्त सादगीपूर्ण र निष्ठावान् व्यक्तित्व भएकाले पत्रकारहरुका लागि सधैं प्रेरणाको स्रोत रहिरहने विश्वास व्यक्त गर्नुभयो । स्मृतिसभामा लुम्बिनी प्रदेशका सांसद् विजय बहादुर यादव, जसपाका नेता कमरुद्दिन राई, लक्ष्मी नारायण बर्मा, प्रतिष्ठानका महासचिव शुक्रऋषि चौलागाईं, नेपाल प्रेस यनियनका बाँके शाखा अध्यक्ष अर्जुन ओली, प्रेस संगठनका अध्यक्ष डक्टप्रसाद धितालले स्वर्गीय गुप्तले देखाउनुभएको बाटोमा हिंड्न सक्नुपर्नेमा जोड दिनुभयो ।
स्वर्गीय गुप्त नेपाल प्रेस युनियन बाँकेका संस्थापक अध्यक्ष र नेपाल पत्रकार महासंघ बाँकेका पूर्व अध्यक्ष हुनुहुन्थ्यो । यस अघि विहान प्रतिष्ठानका तर्फबाट निलसागर सेवा आश्रममा आश्रीत एक सय ६५ जना खाना खुवाइएको थिये । भोजन खुवाउने कार्यक्रममा प्रतिष्ठानका अध्यक्ष विजय कुमार गुप्ता, उपाध्यक्ष अजय गुप्ता, महासचिव शुक्रऋषि चौलागाई, कोषाध्यक्ष शालु गुप्ता लगायतको उपस्थिती रहेको थियो ।
Discussion about this post