दाङ फागुन १० गते ।
माटोलाई ढुंगाको भर, ढुंगालाई माटोको भर भनेजस्तै दाङमा एउटा यस्तो अचम्मको ढुंगा छ – जो पर्यटकीय केन्द्र बनिरहेको छ। तुलसीपुर उपमहानगरपालिका-१४ ड्वाङपुरमा रहेको उक्त ढुंगा हेर्न अचेल दैनिक सयौँ आन्तरिक पर्यटकहरू आउने गरेका छन्। उक्त ढुंगालाई स्थानीयले भने शिवको प्रतिमाका रूपमा पूजा गर्ने गरेका छन्।
समथल जमिनबीच उठेको माटोको ढिस्कोमाथि रहेको उक्त ढुंगा वर्षौंदेखि केहि नभएको स्थानीयहरू बताउँछन्। तर, पछिल्लो समय पर्यटकीय केन्द्र बन्दै गइरहेको अवस्थामा भने स्थानीय तहले संरक्षणमा चासो नदिँदा जीर्ण बन्दै गइरहेको छ। प्राकृतिक बनोटसँगै यस ढुंगाबारे एक धार्मिक कथन पनि जोडिएको छ। परापूर्वकालमा ५ पाण्डवहरू त्यस ठाँउमा आएर एक रात बास बसेको भन्ने कथन रहेको हात्ती ढुंगा संरक्षण समितिका अध्यक्ष बल बहादुर विकले बताए।
‘यो अचम्मलाग्दो प्राकृतिक दृश्य सयौँ वर्षदेखि यस्तै छ,’ उनले थपे, ‘हाम्रा बाउ बाजेहरूको पालादेखि अहिलेसम्म उस्तै छ, हामीले यसलाई संरक्षण गर्न हात्ती बाघ ढुंगा पर्यटन विकास समिति गठन गरेका छौँ।’ अचेल दैनिक सयौँ तथा विदाको दिनहरूमा हजारौँ मानिसहरू अवलोकन गर्ने आउने गरेको समेत उनले बताए। प्राकृतिक रूपमा बनेको यो स्थानको बारेमा धेरैलाई थाहा नै छैन। लगभग ५०/६० वर्ष पहिलेदेखि नै यो दृष्य जस्ताको तस्तै छ। पहिलेको तुलनामा अहिले वरपरको दृष्य परिवर्तन भएको छ भने बीचमा रहेको ठूलो ढुंगाको संरचना भने फेरिएको छैन्।
त्यहाँ आउने पर्यटकले यो एउटा माटोको ढिस्कोमा कसरी यत्रो ढुंगा कसरी अडिएको छ भन्ने कुरामा चासो व्यक्त गर्ने गरेका र यो पर्यटकीय गन्तव्य बनिरहेकाले संरक्षणमा सबैले जोड दिनुपर्ने स्थानीय वर्षा पोखरेलले बताइन्। राज्यले नै यसतर्फ ध्यान दिनुपर्ने उनको भनाइ छ
Discussion about this post