खोजखबर संवाददाता
बाँके भदौ २५ गते । नेपाल सरकारका सहरी विकास मन्त्री मोहम्मद ईश्तियाक राई आज बुधवार बेलुकी गृहनगर नेपपालगन्ज आउँदै हुनहुन्छ । बाँके क्षेत्र नम्बर २ का सांसद समेत रहनु भएका मन्त्री राई बाँके र सुर्खेतमा आयोजना गरिने विभिन्न कार्यक्रमहरुमा सहभागि हुनका लागि गृहनगर आउन लाग्नु भएको हो ।
मन्त्री राईको सचिवालयले दिएको जानकारी अनुसार बुधवार बेलुकीको उडानबाट उहाँ नेपालगन्ज आउने तथा विहिबार, शुक्रवार र शनिवार बााके र सुर्खेतका विभिन्न कार्यक्रममा सहभागि हुनु हुनेछ ।
नेपालगन्ज उपमहानगरका लागि बहुप्रतिक्षित आयोजनाको रुपमा रहेको फोहर विसर्जन गर्ने ल्याण्डफिल साइटको निर्माण पुरा गरिएको हुँदा मन्त्री राईले विहिबार सो ल्याण्डफिल साईटको उदघाटन गर्नु हुनेछ ।
ल्याण्डफिल साईटको औपचारिक रुपमा सञ्चालन गरिएपछि नेपालगन्जमा संकलन हुने ठुलो परिमाणको फोहोर विसर्जनमा सहजता आउने र फोहोरको समस्या समाधान हुने बताइएको छ ।
ल्याण्डफिल साइटको अभावमा लामो समयदेखि नेपालगन्जबाट निस्कने फोहोर विसर्जनमा ठुलो समस्या रहेको थियो । ठाउँ फेरी फेरी फोहोर फाल्नु पर्दा धेरै समस्या आउने गरेको थियो ।
विहिबार मन्त्री राईले उदघाटन गरे लगत्तै सो साईटलाई औपचारिक रुपमा सञ्चालनमा ल्याइने र त्यसपछि फोहोर विसर्जनको समस्या समाप्त हुने छ ।
यसैगरी मन्त्री राईले शुक्रवार बाँकेको सबैभन्दा दुर्गममा रहेको नरैनापुर गाउँपालिकाको लक्ष्मणपुरमा निर्माण गरिएको सुविधा समपन्न अस्पतालको पनि उदघाटन गर्नु हुने कार्यक्रम रहेको छ । सो क्षेत्रमा राम्रो स्वास्थ्य संस्था नहुँदा अधिकांश विरामीले भारतमा गएर उपचार गराउनु पर्ने बाध्यता रहेको थियो ।
सडक समस्या कारण नेपालगन्ज टाढा भएकोले विरामीहरुले समस्या भोग्दै आएकोमा अब सो अस्पताल संचालनमा ल्याईएपछि धेरै हदसम्म सो समस्या पनि समाधान हुने नरैनापुर गाउँपालिकाका अध्यक्ष ईश्तियाक अहमद शाहले बताउनु भयो ।
यसैगरी मन्त्री राईले शनिवार सुर्खेत पुगेर त्यहाँ निर्माण गरिएको सुर्खेत बसपार्क र अस्पतालको भवनको उदघाटन गर्दै कर्णाली प्रदेशका मुख्य मन्त्रीलाई हस्तान्तरण गर्ने कार्यक्रम रहेको मन्त्री राईको सचिवालयले जनाएको छ ।
बाँकेको विकासका लागि अर्बौको बजेट विनियोजन गरेर जनतामाझ लोकप्रिय र चर्चित बन्नु भएका मन्त्री राई आफ्नो जिल्ला र निर्वाचन क्षेत्रको विकास निर्माणको अवस्था बुझ्न, जनताका समस्या सुन्न तथा जनतासंग भेटघाट गर्न हरेक महिनाजसो गृहनगर आउने गर्नु भएको छ ।
मन्त्री राईले नेपालगन्जसम्मिलित क्षेत्र नम्बर २ को विकासका लागि करिब ५ अर्ब बराबरका योजनाहरु संचालन गर्न लगाउनु भएको उहाँका स्वकिय सचिव शमसुल राईले बताउनु भयो ।
Discussion about this post