बाँके माघ २९ गते ।
सरकारले बैशाख ३० मा स्थानीय तहको निर्वाचनको मिति घोषणा गरिसकेको छ । आकांक्षीहरु चुनावी अभियानमा जुटिसकेका छन् । उनीहरु आन्तरिक भेटघाट तथा कार्यकर्तामाझ पुग्न थालिसकेका छन् ।
नेपालगन्जको मेयर पदमा जनता समाजवादी पार्टीका कमरुद्दिन राइले उम्मेदवारी घोषणा गर्दै चुनावी अभियान थालिसक्नुभएको छ । उहाँले आफ्नो उम्मेदवारी नेपालगन्जको विकास र सम्बृद्धिका लागि भएको बताउनुभएको छ ।
नेपालगन्जका २३ वटै वडालाई समानुपातिक ढंगले विकास गर्नका लागि भएको बताउनुभएको छ । अहिलेका मेयर धवलशम्शशेर रणाले विभेदपूर्ण तरिकाले विकास गरेको उहाँको आरोप छ ।
शिक्षा, स्वास्थ्य र कृषि क्षेत्रमा पछाडी पारिएका वडा नम्वर १३, १४, १५, १६, १७, १८, १९, २०, २१, २२ र २३ मा अहिलेपनि विकास नभएको उहाँको भनाइ छ । अहिलेका मेयरले शहरीक्षेत्रका केही वडाको विकास गरेपनि अन्यक्षेत्रमा विकासै नगरेको राइको भनाइ छ ।
उहाँले मेयरले आफ्ना कार्यकर्ता पाल्ने काममात्रै गरेको बताउनुभयो । उहाँले मेयर राणाले ढल निकासलाई पूर्णता दिन नसकेको, नगरपालिकाका गाडी ठेक्कामा दिएको, शौचालयको अवस्था विजोग बनाएको राइको भनाइ छ ।
शौचालय ठेक्कामा दिएका कारण अहिले नगरबासी विशेषगरी महिलाहरुलाई शौच गर्न महिलालाई ठूलो समस्या परेको उहाँको भनाइ छ ।
यस्तै कोभिड महामारीमा विभेदपूर्ण तरिकाले राहात वितरण गरेकोमा पनि उहाँले असन्तुष्टि जनाउनुभयो । उहाँले आफ्ना चुनावी एजेन्डा विकास निर्माण, शिक्षा, बाटोघाटो, सरसफाइ रहेको बताउनुभयो । आफ्नो पार्टीबाट जितेका जनप्रतिनिधिले नमुनायोग्य काम गरेको भन्दै त्यहीअनुसार विकास गरिने बताउनुभयो ।
नरैनापुरमा आफ्नै पार्टीका उम्मेदवारले जितेर अहिले त्यहाँ नमुनायोग्य काम भएको र नेपालगन्जमा पनि संघीय सांसद मोहम्मद इस्तियाक राइले धेरै विकास निर्माण गरेको उहाँको भनाइ छ ।
सडक निर्माणदेखि स्वास्थ्यक्षेत्र, धार्मिक संघसंस्थामा ठूलो लगानी गरिएको राइले बताउनुभयो । नेपालगन्ज धार्मिक पर्यटकहरुको सम्भावना बोकेको क्षेत्र भएकाले यसको विकासमा आफ्नो प्रतिबद्धता जनाउनुभयो ।
पूर्वमन्त्री राइले गरेका कामहरुलाई अघि बढाउने उद्घोष समेत उहाँले गर्नुभयो । उहाँले कोभिड महामारीमा आफुले निस्वार्थ जनताको सेवा गरेको बताउनुभयो । खान नपाएर छटपटाएका मानिसहरुलाई पूर्वमन्त्री राइको पहलमा घरघरमा पुगेर राहात बाँडीएको बताउनुभयो ।
यसअघि मेयरमै प्रतिस्पर्धा गरेका राइ राणासँग पराजित हुनुभएको थियो । चुनावमा पराजित भएपनि आफुले निरन्तर जनताको सेवामा खटिएको उहाँको भनाइ छ । जनताको सुखदुखमा सधैं आफु व्यक्तिगत तरिकाले पनि सहयोग गरेको राइले बताउनुभयो ।
आफ्नो जित्ने आधार प्रस्तुत गर्दै उहाँले यसअघि संगठन पनि बलियो बनेको, पार्टीमा भित्रिनेको संख्या बढेको र नागरिकको समेत साथ भएको बताउनुभयो ।
पछिल्लो पटक उपमहानगरपालिका हुँदा गँसिएका वडाको विकासमा ध्यान दिइने उहाँको भनाइ छ । उहाँले गरिव पहिचान आफ्नो प्राथमिकता दिइने बताउनुभयो । गरिवी र असाहयको लागि औषधि उपचारमा निशुल्क गरिने बताउनुभयो ।
Discussion about this post