खोजखबर संवाददाता बाँके असोज ११ गते । शनिबारदेखि सुरु भएको प्रतियोगिताको उद्घाटन खेलमा महिला उद्यमी र महिला पत्रकार विच मैत्रीपुर्ण फुटबल प्रतियोगिता भएको थियो । मैत्रिपुर्ण फुटबल प्रतियोगिता खेलमा महिला पत्रकार टिमले महिला उद्यमी टिमलाई ३ का विरुद्ध २ गोलले पराजित गरेको छ ।
महिला पत्रकार टिमबाट योगिनी श्रेष्ठले २ गोल र ममता थापाले १ गोल गरि ३ गोल पुर्याएका थिए भने महिला उद्यमी टिमबाट बिन्दु चर्ति मगर र परिना चौधरीले १= १ गोल प्रहार गरेका थिए । खेलको उदघाटन प्रतिनिधि सांसद नन्दलाल रोकायले गर्नुभएको थियो भने उद्घाटन खेलमा विभिन्न राजनितिक दलका प्रतिनिधि, बुद्धिजिवी, स्थानियवासी, प्रहरी, पत्रकार लगायतको सहभागिता रहेको थियो ।
प्रथम योगिनी कप फुटबल प्रतियोगितालाई सिजी ब्रुअरी (नेपाल) प्रालिले मुख्य प्रयोजन गरेको छ । त्यसैगरी सनराइज एकेडेमी, नेपालगंजले सहप्रायोजकको रुपमा प्रतियोगितामा सहकार्य गरेको आयोजकले जनाएको छ । खजुरा गाउँपालिका, २ गौघाटमा भैरहेको प्रतियोगिताका ८ वटै क्लबका पदाधिकारीहरुको उपस्थिति रहेको थियो । असोज ११ गतेदेखि १७ गतेसम्म संचालन हुने प्रतियोगितालाई भव्य र मर्यादित बनाउन विभिन्न समितिहरु गठन भएको प्रतियोगिता संयोजक तरिन्द्र थापाले बताउनुभयो । प्रतियोगिताको पहिलो खेल आयोजक योगिना–११ को ए टिम र नेपालगंज बहुमुखी क्याम्पस (एनएमसी) टिमबीच प्रतिस्पर्धा भएको थियो ।
युवाहरुलाई फुटबलको माध्यमबाट सामाजिक क्षेत्रमा अग्रसर गराइ उनीहरुमा भएको सृजनशील पाटोलाई उजागर गर्ने उद्देश्यका साथ यो प्रतियोगिता संचालन गराउन लागेको आयोजक हिप नेपालले जानकारी गराएको छ । यो प्रतियोगिताले स्थानीय फुटबल क्लब र खेलाडीहरुमा नयाँ ऊर्जा थप्ने र समग्र बाँकेको फुटबल विकासमा योगदान पुग्ने आँकलन गरिएको छ ।
प्रतियोगितामा बाँके र बर्दियाका गरी ८ टिमले नकआउटका आधारमा प्रतिस्पर्धा गर्नेछन । प्रतियोगिताको विजेताले ५० हजार, उपविजेताले २५ हजार, सर्वोत्कृष्ट खेलाडीले १० हजार, र विधागत रुपमा उत्कृष्ट प्रशिक्षक, गोलकिपर, डिफेन्स, मिडफिल्डर र फरवार्डल समान रुपमा ५ हजार रुपैयाँ, ट्रफी , मेडल, प्रमाणपत्र र पुरस्कार पाउने आयोजक संस्था सहयोगी आवाज (हिप) नेपालले जानकारी गराएको छ ।
Discussion about this post